कञ्चनपुर- कञ्चनपुर प्रहरीले जुवातास खेलिरहेको अवस्थामा ९ जनालाई नियन्त्रणमा लिएको छ। शनिबार साँझ ५ बजेतिर भिमदत्त नगरपालिका–१ भासीस्थित सुरेन्द्र भण्डारीको घरमा जुवातास खेलिरहेको भन्ने गोप्य सूचनाको आधारमा प्रहरीले खानतलासी गरेको थियो।
खानतलासीका क्रममा भिमदत्त नगरपालिका–६ ऐठपुरका ५० वर्षीय दीपक पाठकसहित ९ जना व्यक्तिहरूलाई जुवातास खेलिरहेको अवस्थामा जिल्ला प्रहरी कार्यालयबाट खटिएको प्रहरी टोलीले नियन्त्रणमा लिएको हो।
घटनास्थलबाट प्रहरीले ५५ हजार नगद र ८ गड्डी तास समेत बरामद गरेको जनाएको छ। हाल पक्राउ परेका सबै व्यक्तिहरूमाथि जुवातास ऐन अन्तर्गत मुद्दा दर्ता गरी थप अनुसन्धान भइरहेको जिल्ला प्रहरी कार्यालय कञ्चनपुरले जनाएको छ।