लक्ष्मी भट्ट/अत्तरिया- नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय अत्तरिया, कैलालीले २०८३ साल जेठ महिनामा ट्राफिक नियम उल्लङ्घन गर्ने ३ हजार १ सय ९५ सवारी साधनमाथि कारबाही गर्दै २७ लाख ५४ हजार रुपैयाँ राजस्व संकलन गरेको छ ।
कार्यालयका सूचना अधिकारी प्रहरी निरीक्षक सीताराम बिष्ट का अनुसार ट्रक ४३६ वटाबाट ४ लाख ५१ हजार, बस १९४ वटाबाट २ लाख ९ हजार ५ सय, जिप ८१५ वटाबाट ७ लाख ४८ हजार, ट्र्याक्टर २९६ वटाबाट २ लाख ३५ हजार ५ सय, मोटरसाइकल तथा स्कुटी १ हजार ७० वटाबाट ७ लाख ७५ हजार ५ सय र अन्य ३८४ सवारी साधनबाट ३ लाख ३४ हजार ५ सय रुपैयाँ राजस्व संकलन भएको हो ।
प्रहरी निरीक्षक बिष्टले एकै महिनामा साढे २७ लाख रुपैयाँभन्दा बढी राजस्व उठ्नु सकारात्मक भए पनि ठूलो सङ्ख्यामा सवारी साधनले ट्राफिक नियम उल्लङ्घन गरेको तथ्यले चिन्ता बढाएको बताए । उनले सबै सवारी चालकलाई ट्राफिक नियमको पूर्ण पालना गर्न र कारबाहीमा नपर्न आग्रह गरेका छन् ।
उक्त तथ्याङ्कले सुदूरपश्चिम प्रदेश मा अझै पनि ट्राफिक नियम उल्लङ्घन गर्ने प्रवृत्ति विद्यमान रहेको स्पष्ट पारेको छ ।