कैलाली- कैलालीको गौरीगंगा नगरपालिका–७ मनिकापुरका तिलराम चौधरी र नेपालु चौधरीले नेकपा एमाले परित्याग गरी नेपाली कांग्रेस मा प्रवेश गरेका छन्। त्यस्तै वडा नम्बर ८ चमारीपुरकी ममता नेगी पनि एमाले त्यागेर कांग्रेसमा आबद्ध भएकी छन्।
नवप्रवेशीहरुलाई कांग्रेसका नेता तथा कैलाली निर्वाचन क्षेत्र नम्बर ४ का उम्मेदवार गोरखबहादुर बिष्ट ‘आनन्द’ ले टीका तथा खादा लगाएर स्वागत गरेका हुन्।
कार्यक्रममा बोल्दै बिष्टले पार्टीमा प्रवेश गर्ने सबैलाई सक्रिय भूमिका निर्वाह गर्न आग्रह गर्दै विकास, सुशासन र जनहितका एजेण्डामा एकजुट भएर अघि बढ्ने प्रतिबद्धता व्यक्त गरे। उनले कांग्रेस लोकतन्त्र, समावेशिता र समृद्धिको भरोसायोग्य शक्ति भएको दाबी गरे।
नवप्रवेशीहरुले पनि कांग्रेसको नीति, कार्यक्रम र नेतृत्वप्रति विश्वास व्यक्त गर्दै आगामी निर्वाचनमा पार्टीलाई विजयी बनाउन सक्रिय रहने बताएका छन्। स्थानीय तहमा पछिल्लो समय विभिन्न पार्टी परित्याग गरी कांग्रेसमा प्रवेश गर्ने क्रम बढ्दो रहेको बताइएको छ।
