अत्तरिया, १५ साउन- कैलालीको गोदावरीमा रहेको काठेपुलमा नेपालका झण्डाहरु फेरिएका छन् । सुदुरपश्चिमको प्रमुख केन्द्र धार्मिक पर्यटकिय क्षेत्र गोदावरी धाममा रहेको काठेपुलमा राखिएको नेपालका झण्डाहरु आज (शुक्रबार) फेरिएका हुन ।
पर्यटकीय क्षेत्रका रुपमा प्रचार-प्रसार गर्ने उद्देश्यले अत्तरियामा रहेको थ्रिडिभिएल क्रियशनले गत चैत २१ गते उक्त पुलमा २१ वटा नेपालका झण्डा फहराइएको थियो ।
आज साउन १५ गते अर्थात खीर खाने दिनको अवसरमा उक्त पुलमा थ्रिडिभियल क्रियशनको गोदावरी काठे पुल पिकनिक स्पट संरक्षक समितिले पुराना झण्डाको सट्टा १६ वटा नयाँ झण्डाहरु फेरेको हो ।
फेरिएका नयाँ झण्डाहरु सुदूरपश्चिमका मुख्यमन्त्री त्रिलोचन भट्टले अनावरण गरेका थिए । गोदावरी नगरपालिकाको सहयोगमा काठेपुलका झण्डाहरु फेरिएको संरक्षक समितिका अध्यक्ष यज्ञराज भाटले बताए ।
