हाल मनसुनको न्यूनचापीय रेखा सरदर स्थान आसपास अवस्थित रहनुका साथै अरब सागर तथा बङ्गालको खाडीबाट जलवाष्पयुक्त हावाको समेत प्रभाव रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ ।
महाशाखाले जारी गरेको आजको मौसम बुलेटिनअनुसार दिउँसो देशभर सामान्यतया बदली रहनेछ । बागमती, गण्डकी, लुम्बिनी र सुदूरपश्चिम प्रदेशलगायतका पहाडी भूभागका केही स्थानमा मध्यम वर्षा हुने सम्भावना छ । त्यस्तै, बाँकी भूभागका कतिपय स्थानमा पनि मध्यम वर्षा हुन सक्ने विभागको अनुमान छ । बागमती, गण्डकी, लुम्बिनी, कर्णाली र सुदूरपश्चिम प्रदेशका एक–दुई स्थानमा भने भारी वर्षा पर्न सक्ने सम्भावना रहेको छ ।
आज राति पनि देशभर सामान्यतया बदली रहँदा कोशी, लुम्बिनी र सुदूरपश्चिम प्रदेशसँगै देशका अन्य पहाडी भूभागका केही स्थानमा मध्यम वर्षा हुने महाशाखाले जनाएको छ । कोशी र सुदूरपश्चिम प्रदेशका एक–दुई स्थानमा भारी वर्षाको पनि सम्भावना छ ।
विभागले वर्षाका कारण पहिरो तथा गेग्रान बहाव (डेब्रिज फ्लो) को जोखिम रहने, ठूला तथा साना नदीनाला र खोलाहरूमा पानीको सतह बढ्न सक्ने तथा यातायात क्षेत्र प्रभावित हुनसक्ने प्रक्षेपण गरेको छ । साथै, सबैलाई सतर्क रहन तथा पूर्वतयारी गर्न पनि महाशाखाले अनुरोध गरेको छ ।
