धनगढी- सुदूरपश्चिम प्रदेशको राजधानी धनगढीमा सञ्चारकर्मीहरूले सरकारले गरेको सामाजिक सञ्जाल बन्दविरुद्ध विरोध प्रदर्शन गरेका छन् । अनलाइन टिभी पत्रकार संघ सुदूरपश्चिमको अगुवाइमा आइतबार मुख्यमन्त्री कार्यालय अगाडि पत्रकारहरूको उपस्थितिमा विरोध कार्यक्रम गरिएको हो ।
विरोध कार्यक्रममा सहभागी सञ्चारकर्मीहरूले सरकारले सामाजिक सञ्जाल नियमन गर्ने नाममा पूर्णरूपमा बन्द गर्नु अभिव्यक्ति स्वतन्त्रता, सूचना पाउने हक र जनजीवनमाथिको प्रत्यक्ष प्रहार भएको बताएका छन् ।
अनलाइन टिभी पत्रकार संघ सुदूरपश्चिमका अध्यक्ष भक्तराज जोशीले सरकारको यो कदम गैरजिम्मेवार भएको उल्लेख गर्दै “सामाजिक सञ्जाल नियमन होइन, पूर्ण बन्द गर्नु भनेको लाखौँको रोजीरोटी खोस्ने कार्य हो” भने ।
यस्तै, नेपाल पत्रकार महासंघ कैलालीका अध्यक्ष श्रवण देउवाले सरकारले आलोचना सहन नसकेको प्रस्ट भएको बताए । उनका अनुसार “आलोचना मिडिया वा सामाजिक सञ्जाल बन्द गरेर रोकिँदैन, यस्तो सोच नै नीतिविरुद्धको हो ।”
नेपाल पत्रकार महासंघ कैलालीका निवर्तमान अध्यक्ष हिमालय जोशीले सामाजिक सञ्जालमाथिको प्रतिबन्धलाई गणतन्त्र र लोकतन्त्रकै आधारस्तम्भमाथिको आक्रमण भने ।
अनलाइन टिभी पत्रकार संघका केन्द्रीय सदस्य विरेन्द्र धामीले यो कदमले लाखौँ नेपालीलाई प्रत्यक्ष असर पारेको बताए । विदेशमा रहेका नेपाली आफ्ना परिवारसँग सामाजिक सञ्जालमार्फत सम्पर्कमा रहँदै आएका थिए तर अब फेरि विछोडिएको उनको भनाइ थियो ।
उनले थपे, “म जस्तै हजारौँ युवाको रोजीरोटी डिजिटल मिडियामै निर्भर छ, सरकारले पेटमै लात हानेको छ ।” नेपाल पत्रकार महासंघ सुदूरपश्चिमका अध्यक्ष भरत शाहले सरकारले यथाशीघ्र प्रतिबन्ध फुकुवा गर्नुपर्ने माग राखे ।
विरोध कार्यक्रममा विभिन्न मिडियामा कार्यरत पत्रकारहरूको उल्लेख्य उपस्थिति रहेको थियो । अनलाइन टिभी पत्रकार संघले यस विषयमा चरणबद्ध आन्दोलन गर्ने चेतावनी समेत दिएको छ ।