अत्तरिया- अत्तरिया उद्योग वाणिज्य संघलाई विधान अनुसार काम गर्न दिन उच्च अदालत दिपायलले आदेश दिएको छ ।जिल्ला प्रशासन कार्यालय कैलालीको नाममा परमादेश जारी गर्दै उच्च अदालतले विधान बमोजिम काम गर्न दिन आदेश दिएको हो ।
प्रादेशिक महोत्सवका बेला टिकट बिक्रिमा अनियमितता गरेको आरोपमा मुछिएपछि अत्तरिया उद्योग वाणिज्य संघका केही सदस्यले राजीनामा बुझाएका थिए । ५ मंसिरमा संघका ११ जनाले राजीनामा दिएका थिए ।
त्यसपछि संघले २८ पुसमा ६ जना सदस्य मनोनित गरेको थियो । तर उद्योग वाणिज्य संघले विधान विपरीत सदस्य मनोनित गरेको ठहर गर्दै सदस्य मनोनयन गर्ने निर्णय समेत बदर गरेको छ ।
संघका नाममा परमादेश जारी गर्दै उच्च अदालतले संस्थाको विधान बमोजिम सदस्य र पदाधिकारी पदपूर्ति गर्न गराउन हुन समेत आदेश दिएको छ ।
