अत्तरिया- गृहमन्त्री रमेश लेखकले कैलाली स्थित प्रादेशिक आपतकालीन गोदामघरको हस्तान्तरण गरेका छन । धनगढी उपमहानगरपालिका १३ मा रहको धनगढी विमानस्थलमा रहेको आपतकालीन गोदामघर सुदूरपश्चिम प्रदेशका मुख्यमन्त्री कमलबहादुर शाहलाई हस्तान्तरण गरेको हो ।
आपतकालीन गोदामघर हस्तान्तरण कार्यक्रममा बोल्दै गृहमन्त्री लेखकले भने , “सात प्रदेश मध्ये ६ प्रदेशको आपतकालीन गोदामघर रहेको तर केही आवश्यक सामाग्री झिक्न प्राधिकरण अनुमति चाहिने भएकाले प्रदेश सरकारलाई नै हस्तान्तरण गरिएको हो ।”
काठमाडौंमा रहेको आपतकालीन गोदामघरलाई केन्द्रिय आपतकालीन गोदामघरको रुपमा विकास गर्ने र विदेशबाट समेत सामाग्री मगाउनुपर्ने, वैदेशिक सहयोग तथा खरीद गरेर प्रदेशका आपतकालीन गोदामघरलाई बितरण गरिने समेत उनले बताए ।
उनले भने , कार्यबिधि सँगै आवश्यक मापदण्ड बनाएर प्रदेशलाई हस्तान्तरण गरिएका आपतकालीन गोदामघरको रेखदेख प्रदेश सरकारले गर्नुपर्ने र विपद्को समयमा सुरक्षा निकायलाई प्रदेश सरकारसँग समन्वयमा काम गर्न निर्देशन समेत निर्देशन दिए ।
त्यसैगरी, प्रदेशमा रहेका आपतकालीन गोदामघरमा बिपद्को समयमा आवश्यक पर्ने त्रिपाल, कम्बल सँगै खाद्यान्न औषधि लगायतका सामाग्री उपलब्ध हुने समेत गृहमन्त्री लेखकले बताए ।
