अत्तरिया- एसइईको परीक्षामा कैलालीको गोदावरीबाट उत्कृष्ट नतिजा ल्याएका तिन जना विद्यार्थीहरूलाई गोदावरी नगरपालिकाले बधाई तथा शुभकामना ज्ञापन गरेको छ ।
नगरपालिकाको शिक्षा शाखाले आज कार्यालयमै बोलाएर गोदावरीका तिन विद्यालयबाट ४ जिपिए ल्याएका तिन जना विद्यार्थीहरूलाई बधाई तथा शुभकामना ज्ञापन गरेको हो । नगरपालिकाका नगरप्रमुख बिरेन्द्र भट्ट, उपप्रमुख शारदा देवी रोकाया र शिक्षा शाखाले एसईईमा ४ जिपिए हासिल गरेका अत्तरिया स्थित दुर्गालक्ष्मी नमुना माविकी छात्रा नितिका अवस्थी, सत्यवती एकेडेमीका निर्मल ठगुन्ना र सैनिक आवासीय महाविद्यालय तेघरीका बिकास रावतलाई अबिर र खादा लगाएर बधाई दिँदै आगामी दिनको शुभकामना व्यक्त गरेका छन् ।
नगर प्रमुख र उपप्रमुखले विद्यार्थीहरू सँगै अभिभावक र विद्यालयका प्रधानाध्यापकहरूलाई पनि अबिर र खादा लगाएर धन्यवाद ज्ञापन गरेका छन् । विद्यार्थीहरूलाई बधाई दिँदै नगरपालिकाका नगर प्रमुख बिरेन्द्र भट्टले सुदूरपश्चिम प्रदेशमा ४ जिपिए हासिल गर्ने ६ मध्ये तीन जना गोदावरीका रहेकामा खुसी व्यक्त गरेका छन् । उनले विद्यार्थी सँगसँगै अभिभावक र शिक्षकहरूलाई धन्यवाद दिँदै विद्यार्थीहरूको उज्जवल भविष्यको शुभकामना प्रदान गरेका छन् ।
उत्कृष्ट नतिजा ल्याएर शिक्षामा गोदावरी नगरपालिका उत्कृष्ट रहेको भनी चिनाउन सफल विद्यार्थीहरूप्रति आभार व्यक्त गरे ।
नगर प्रमुख भट्टले आज सामान्य रुपमा बधाई तथा शुभकामना दिइएको बताउँदै शिक्षा शाखा अन्तर्गतको विशेष कार्यक्रममा उत्कृष्ट विद्यार्थीहरूलाई सम्मान गर्ने बताएका छन् । सबैले सकारात्मक सोचका साथ सबैको समन्वय रहेर अगाडि बढ्यौ भने हरेक कुरामा सफलता मिल्ने नगर प्रमुख भट्टले बताए ।