डडेल्धुरा- बैतडी घर भइ डडेल्धुरामा चोरी गर्ने गोरख बहादुर चन्द पक्राउ परेका छन् । बैतडीको मेलौली नगरपालिका वडा नम्बर ९ रोकटाका २२ वर्षीय चन्द पक्राउ परेका हुन् ।
जिल्ला प्रहरी कार्यालय डडेल्धुराका अनुसार चन्दले डडेल्धुराको भागेश्वर गाँउपालिका–३ तल्लो चौराहा लामिकाण्डेका ३९ वर्षीय हिक्मतसिंह खड्काको आशिष एण्ड आरुष किराना पसलमा चैत ११ गते चोरी गरेका थिए । प्रहरी निरीक्षक तथा सूचना अधिकारी करवीर सिंह ऐरका अनुसार, चन्दले पसलको मूलढोकामा लगाएको कुण्डी र ताला तोडफोड गरि नगद ४८ हजार र अन्य खुद्रा सर–सामान सहित ९५ हजार ५ सय बराबरको चोरी गरी फरार थिए ।
तर, प्रहरीले उनलाई चैत १६ गते पक्राउ गरेको हो । डडेल्धुरा जिल्ला अदालतबाट ७ दिनको म्याद थप भई थप अनुसन्धान भइरहेको छ । चन्द चोरी सम्बन्धी कसुरमा २ वर्ष कैद भुक्तान गरि डडेल्धुरा जिल्ला कारागारबाट चैत ११ गते छुटेका थिए। उनले छुटेकै दिन चोरी गरेका हुन् ।
