डोटी- डोटीको दिपायलस्थित पिपल्ला बजारबाट पार्किङ गरी राखिएको मोटरसाइकलबाट दिउँसै दुई लाख ४५ हजार रुपैयाँ गायब भएको छ। शुक्रवार बिहान सगरमाथा लुम्बिनी इन्स्योरेन्स कम्पनीको कार्यालय पछाडि पार्किङ गरी राखिएको मोटरसाइकलबाट उक्त रकम गायब भएको हो।
सरस्वती इलेक्ट्रोनिक्स र प्राची स्टेशनरी पिपल्लाको माथिल्लो तलामा इन्स्योरेन्स कम्पनीको कार्यालय रहेको छ। दिपायल सिलगढी नगरपालिका वडा नं. ५ का हिकमत भण्डारीले झिल्लीमा बेरेर आफ्नो मोटरसाइकलको लेकगाडमा सो रकम झुण्डाएर ल्याएका थिए। उनी सगरमाथा लुम्बिनी इन्स्योरेन्स कम्पनीका कम्प्युटर सहायक हुन्। बैङ्कमा जम्मा गर्न ल्याएको रकम मोटरसाइकलमै छोडेर उनी शुक्रवार बिहान १० बजेर ७ मिनेटमा कार्यालय गएका थिए।
कार्यालयको व्यस्तताले मोटरसाइकलमा राखेको पैसा सँगै लग्न भूलेका भण्डारीलाई करिब डेढ घण्टापछि याद आएको थियो। भण्डारी त्यसपछि पैसा लिन जाँदा गायब रहेको भेटाए। दुःख गरी कमाएको पैसा गायब हुँदा तत्कालै प्रहरीलाई समेत खबर गरेका थिए। प्रहरीले समेत आसपास छानबिन गर्दा रकम फेला पार्न नसकेको जनाएको छ।
पार्कीङ्गका लागि जाँदा पैसा राखिएको झिल्ली उनकै मोटर साइकलमा झुन्डाइएको फुटेज सिसिटिभी क्यामेरामा देखिएको भण्डारीले बताए। तर पार्कीङ्ग गरेर राखेको मोटरसाइकल निर क्यामरा बिग्रेको रहेको प्रहरीले बताएको छ। भण्डारीले मानिसहरू धेरै बाहिर भित्र पनि गरेको नदेखिएकाले आसपासकै मानिसबाट गायब भएको आशङ्का गरेका छन्।
