डोटी- डोटीको जिल्ला प्रहरी कार्यालय अगाडि लहरै गाडीहरु रोकिएका छन् । सार्वजनिक यातायतका साधनहरु, मालवहाक ट्रक, नगर बस र मोटरसाइकल समेत पार्किङ गरिएका छन् ।
बसपार्क नभएर यी गाडीहरु सडकमै पार्किङ गर्नु परेको भने होइन। जिल्ला सदरमुकाम सिलगढी बजारमा २०५४ सालमा बसपार्क निर्माण भई २०५५ सालदेखि सञ्चालनमा थियो ।
नगरपालिकाको स्वामित्वमा रहेको झण्डै चार रोपनी जमिनमा बनेको उक्त बसपार्क केही समय सञ्चालनमा पनि रह्यो, नगरपालिकाले पार्किङ शुल्क उठाउन एक जना कर्मचारीको समेत व्यवस्था गरेको थियो । १२ वर्षसम्म राम्रैसँग चलेको उक्त बसपार्क आजभोलि भने सुनसान भएको स्थानीयबासीहरुको भनाई छ ।
बसपार्क निर्माण गर्ने नाममा सरकारी लगानीको दुरुपयोग भएको स्थानीय बिक्रम केसी बताउँछन् । उनी प्रश्न गर्छन् ‘सुविधा सम्पन्न बसपार्क हुँदाहुँदै बसपार्कबाट गाडीहरु सञ्चालन गर्न नसक्नु मा कसको कमजोरी हो?’
उनले यदि त्यो बसपार्क आवश्यक नभए बसपार्कको जग्गा सम्बन्धित जग्गाधनीलाई फिर्ता गर्नु पर्ने धारणा राखे । उनले साँघुरो राजमार्गमा दुईतर्फै गाडी हुँदा पनि सम्बन्धित निकायले ध्यान नदिएको उनको आरोप छ ।
स्थानीय प्रशान्तराज जोशी व्यङ्ग्य गर्दै भन्छन् ‘यो बसपार्क सञ्चालनमा ल्याउन नसक्ने भए यसमा डान्सबार खोल्नु पर्यो ।’ समयमै यातायातको उचित व्यवस्थापन नगरेर सरोकारवाला निकायहरु कुनै अप्रिय दुर्घटनाको पखाईमा रहेका जस्तो आफूलाई महसुस भएको बताउँछन् स्थानीय नबिन श्रेष्ठ ।
कुनै बेला धेरै चहलपहल हुने बसपार्क सञ्चालन नहुँदा सुनसान बनेको बताउँछन् स्थानीय व्यापारी गिरी बोगटी बोगटी । उनी भन्छन् ‘बसपार्क सञ्चालन नहुँदा व्यापार व्यवसायमा समेत मन्दी आउनुका साथै धेरै जसो व्यक्ति पलायन हुने गरेका छन् ।’
यसअघि स्थानीयबासीले सडकमा हुने पार्किङ हटाउन र बसपार्क सञ्चालनमा ल्याउन माग गर्दै गत पुस ७ गते डोटीका प्रमुख जिल्ला अधिकारी र दिपायल सिलगढी नगरपालिकाका प्रमुखलाई ज्ञापन पत्र बुझाएका थिए । तर सम्बन्धित निकायले कुनै सुनुवाई नगरेको उनीहरुको भनाई छ ।
बसपार्कमा टिकट काउण्टर, यात्रु प्रतिक्षालय र शौचालयको समेत व्यवस्था गरिएको भएपनि सवारी साधन भने पार्किङ हुँदैनन् । यात्रुहरु र आफूहरुलाई अपायक भएको भन्दै यातायात सञ्चालकहरुले सडकमै गाडी पार्किङ गर्ने गरेका छन् ।
जिल्ला प्रहरी कार्यालयसँगैको चेकपोष्ट अगाडि मुल सडकको दायाँबायाँ पार्किङ हुने साधनहरुले अछाम, बाजुरा आउजाउ गर्ने साधनहरुले निकै सास्ती खेप्नु परेको छ । यस्तै सिलगढी–पूर्वीचौकी रुटमा चल्ने सार्वजनिक यातायातका साधनहरु नाचन्थली मोडमा सडकमै पार्किङ हुने गरेका छन् ।
राजमार्ग (सडक) मा हुने अवरोध हटाउन गर्नु पर्ने सुरक्षा कारवाहीको कार्यविधि, २०७५ को दफा ३ अनुसार “अव्यवस्थित पार्किङ र ट्राफिक नियमको उलंघनबाट सिर्जित अवरोधजन्य परिस्थिति” लाई राजमार्गमा बिद्यमान समस्या तथा खतरा मानिएको छ ।
