कञ्चनपुर- कञ्चनपुरको भीमदत्त नगरपालिका वडा नम्बर १८ का वडाध्यक्ष रवीन्द्र देवकोटालाई कुट्ने आठ जनाविरुद्ध उजुरी दर्ता भएको छ। राष्ट्रिय युवा संघ नेपालको आन्तरिक किचलोका कारण वडाध्यक्ष देवकोटामाथि कुटपिट भएपछि आठ जनाविरुद्ध उजुरी दर्ता भएको जिल्ला प्रहरी कार्यालय कञ्चनपुरका प्रमुख प्रहरी उपरीक्षक कमल थापाले बताए।
अहिले देवकोटाको पक्षबाट आठ जनाविरुद्ध उजुरी आएको र उनीहरूको खोजी सुरु गरिएको बताए। उनका अनुसार युवा संघको जिल्ला अधिवेशनमा लफडा भएपछि कुटपिट हुँदा देवकोटाको टाउकोमा चोट लागेको छ।
राष्ट्रिय युवा संघ कञ्चनपुरको १० औँ अधिवेशन निर्वाचन संघको जिल्ला समितिको नामावली पार्टी कार्यालयमा टाँस गर्ने क्रममा संघका नेता तथा कार्यकर्ताले टाउकोमा आक्रमण गरेको प्रहरीले जनाएको छ।
देवकोटाले युवा संघका लेखा आयोगका केन्द्रीय सचिव प्रविन बोगटी, एमाले जिल्ला कमिटी सदस्य कमल रोकाया, युवा संघका केन्द्रीय सदस्य रोहित जङ्ग कुँवर, संघको जिल्ला अध्यक्षका आकाँक्षी नवीन चन्द लगायत आठ जनाको समूहले आक्रमण गरेको बताए।
संघका नेता कार्यकर्ताहरूले देवकोटालाई हेलमेट, मुक्का र हातले प्रहार गरेको प्रत्यक्षदर्शीले बताए। देवकोटाको टाउको, छाती लगायत शरीरका विभिन्न भागमा चोट लागेकोले महाकाली प्रादेशिक अस्पताल लगिएको र टाउको चोटका कारण थप उपचारका लागी तत्काल उपचारका लागि धनगढीस्थित माया मेट्रो अस्पताल ल्याएको छ। घटनाको थप अनुसन्धान भइरहेको प्रहरीको भनाई छ।
