धनगढी- सरकारले मन्त्रिपरिषदबाट माघ २९ गते गरेको निर्णय अनुसार गेटामा शहीद दशरथ चन्द राष्ट्रिय स्वास्थ्य विज्ञान विश्वविद्यालय बनाउन माग गर्दै धर्ना दिइएको छ ।
शहीद दशरथ चन्द राष्ट्रिय स्वास्थ्य विज्ञान विश्वविद्यालय सघर्ष समितिले विश्वविद्यालय बनाउन माग गर्दै जिल्ला प्रशासन कार्यालय कैलालीको मूल गेटमा धर्ना दिएको हो ।
सरकारले गेटामा विश्वविद्यालय बनाउने निर्णय गरेर नीति कार्यक्रममा पनि समेटिएपनि अगामी आर्थिक वर्षको बजेटमा शहीद दशरथ चन्द स्वास्थ्य विज्ञान प्रतिष्ठानका रुपमा स्थापना गर्ने उल्लेख गरेपछि सघर्ष समितिले आन्दोलन गर्दै आइरहेको छ ।
सोही क्रममा संघर्ष समितिले बिहान साढे १० बजे देखि आधा घण्टा प्रशासनको मूल गेट अगाडि धर्ना दिएको थियो ।समितिले गेटामा ६ सय शैय्याकै अस्पताल पनि संचालन गरिनुपर्ने माग गर्दै आइरहेको छ ।
संघर्ष समितिका संयोजक लोकराज पाण्डेले आफूहरुका माग पुरा नभएसम्म आन्दोलनका कार्यक्रम जारी रहने बताए ।संघर्ष समितिले शनिबार गेटा मेडिकल कलेजको गेटमा सडक बहस कार्यक्रम संचालन गरेको थियो ।
