कञ्चनपुर – सशस्त्र प्रहरी बलले लागुऔषधसहित कञ्चनपुरबाट २ जनालाई पक्राउ गरेको छ। सशस्त्र प्रहरी बल नेपाल नम्बर ३५ हेडक्वाटर शैलेश्वरी कञ्चनपुर मातहतको बोडर आउटपोष्ट पुनर्वासबाट खटिएको टोलीले पुनर्वास नगरपालिका वडा नं. ६ मा लागुऔषधसहित २ जनालाई पक्राउ गरेको हो।
पक्राउ पर्नेमा धनगढी उपमहानगरपालिका वडा नं. ३ जानकी टोल बस्ने १७ वर्षीय आयुष कुँवर र १७ वर्षीय पुष्प शाही रहेको सशस्त्र प्रहरी उपरीक्षक बिरेन्द्रबहादुर ऐरले बताए। उनीहरुले चलाइरहेको से६प १४३१ नम्बरको स्कुटर चेकजाँच गर्दा लागुऔषधि स्प्यासमोबक प्लस ६ पिस, नाइट्राभेट ४ पिस र १ दशमलव २९ ग्राम चरेस बरामद गरिएको प्रहरी उपरीक्षक ऐरले बताए। पक्राउ परेका दुवै जनालाई आवश्यक कारवाहीका लागि ईलाका प्रहरी कार्यालय त्रिभुवनबस्तीमा बुझाइएको सशस्त्र प्रहरीले जनाएको छ।
