अत्तरिया- स्थानीय विकास, सचेतना र सुशासनमा अग्रणी मानिंदै आएका गोदावरी नगरपालिका–१० का वडा अध्यक्ष रविन्द्र शाही गुड्डुको पहलमा एक अत्यन्तै महत्वपूर्ण र प्रभावशाली अभिमुखीकरण कार्यक्रम शुक्रबार सम्पन्न भएको छ।
श्री जानकी माध्यमिक विद्यालयको प्राङ्गणमा आयोजित कार्यक्रम ट्राफिक नियम र फोहोरमैला व्यवस्थापनबारे केन्द्रित थियो। कार्यक्रमको उद्देश्य बालबालिका, विद्यार्थी, शिक्षक, अभिभावक र सुरक्षा निकायलाई एउटै मञ्चमा ल्याई व्यवहारिक चेतना फैलाउने रहेको थियो।
२०७८ सालदेखि विकास, शिक्षा र नागरिक सचेतना अभियानलाई प्राथमिकतामा राख्दै आएका अध्यक्ष गुड्डुले यसपटकको कार्यक्रममार्फत स्थानीय स्तरमै ट्राफिक सुरक्षा र सरसफाइप्रति गहिरो सन्देश प्रवाह गरेका छन्।
कार्यक्रममा क्षेत्रिय ट्राफिक कार्यालय अत्तरिया, गोदावरी फोहोरमैला व्यवस्थापन समिति र विद्यालयको सहकार्य रहेको थियो। सयौं विद्यार्थी, शिक्षक, अभिभावक तथा सरोकारवाला निकायका प्रतिनिधिहरूले सहभागिता जनाएका थिए।
कार्यक्रमको प्रमुख आकर्षणमा ट्राफिक जनचेतनामूलक झाँकी, पोस्टर प्रदर्शन, फोहोर छुट्याउने व्यवहारिक अभ्यास तथा सहभागी विद्यार्थीहरूलाई प्रशंसा–पत्र वितरण रहेका थिए।
अध्यक्ष गुड्डुले मन्तव्य दिँदै भने, “सुरक्षा र सरसफाइ सँगै जान्छन्। ट्राफिक नियम पालना गर्नाले जीवन सुरक्षित हुन्छ भने फोहोर व्यवस्थापनले समाज र वातावरण स्वस्थ रहन्छ।” उनले अभिभावकहरूलाई आफ्ना सन्तानलाई सडक सुरक्षा सम्बन्धी शिक्षामा जोड दिन आग्रह गरे।
कार्यक्रममा ट्राफिक कार्यालयका प्रतिनिधिहरूले विद्यार्थीहरूसँग संवाद गर्दै नियम उल्लंघन गर्दा हुने जोखिमबारे उदाहरणसहित जानकारी गराए भने फोहोरमैला व्यवस्थापन समितिका प्राविधिकहरूले प्लास्टिकजन्य प्रदूषणको असरबारे सचेतना फैलाए।
श्री जानकी माध्यमिक विद्यालयका प्रधानाध्यापकले वडा अध्यक्ष र आयोजक संस्थाहरूप्रति आभार व्यक्त गर्दै विद्यालय यस्ता कार्यक्रमहरूमा सधैं सहकार्य गर्न तयार रहेको बताए।
स्थानीय तहको विकासमा जनसहभागिता आवश्यक हुने विश्वाससहित अघि बढिरहेका अध्यक्ष गुड्डुको यो प्रयासले न केवल गोदावरी–१०, तर सिंगो कैलाली जिल्लामै सकारात्मक सन्देश दिएको सहभागिहरूको भनाइ छ।
कार्यक्रमको समापनमा वडाध्यक्ष गुड्डुले आगामी दिनमा अझ प्रभावकारी र व्यवहारमुखी कार्यक्रम सञ्चालन गर्ने प्रतिबद्धता व्यक्त गरे।
