धनगढी- नेपाली सेनाको सुदूरपश्चिम पृतनाले शुक्रबार लम्कीचुहा नगरपालिका–३ स्थित कर्णाली नदीमा मनसुनजन्य विपत् न्युनिकरण सम्बन्धी संयुक्त कृतिम अभ्यास गरेको छ।
जिल्ला प्रशासन कार्यालय, नेपाल प्रहरी, सशस्त्र प्रहरी, नेपाल रेडक्रस सोसाइटी, यूएनडिपी, वल्र्ड भिजन, ह्यावीटेट नेपाललगायतका संघ, संस्थाको सहभागितामा अभ्यास भएको थियो।
अभ्यासमा नेपाली सेनाले बाढी तथा डुबानको समयमा फसेका व्यक्तिलाई मोटरबोट, रबर बोटबाट खोज तथा उद्धार, खोचमा फसेका व्यक्तिलाई अत्याधुनिक उद्धार सामग्रीको सहायताले कर्णाली पुलबाट झरेर उद्धार अभ्यास गरेको थियो। उद्धार कार्यमा स्थानीय श्रोत साधनबाट तयार साधनबाट पनि उद्धार अभ्यास गरिएको नेपाली सेनाले जनाएको छ।
सशस्त्र प्रहरी बल नेपालका गोताखोरबाट नदीमा बेपत्ताको खोज, उद्धार तथा नेपाल प्रहरीको टोलीले समेत रबरबोटबाट अभ्यास गरेको थियो।
स्थानीय श्रोत साधन प्रयोगबाट विपदको असर कम गर्न सहयोग पुग्ने विश्वास गरेको सुदूरपश्चिम पृतनाका प्रमुख सेनानी रवि खड्काले जानकारी दिए ।
अभ्यासमा सुदूरपश्चिम पृतनाका पृतनापति, उपरथि विजय थापा, प्रहरी नायब महानिरीक्षक भरतबहादुर बोहरा, जिल्ला सुरक्षा समितिका सदस्य, विभिन्न संघ संस्थाका प्रतिनिधिलगायत स्थानीयको समेत उपस्थिति रहेको थियो।