अत्तरिया, २५ जेठ- गोदावरी नगरपालिकामा दोस्रो लहरको कोरोना संक्रमण फैलिएपछि सुरु गरेको खोप कार्यक्रममा उत्साहजनक सहभागिता देखिएको छ । नगरपालिकामा जेष्ठ नागरिक ६० देखि ६४ बर्ष उमेर समूह र पहिलो प्राथमिकतामा परेर खोप लगाउन छुटेकालाई मंगलबार देखि सुरु गरेको खोप कार्यक्रममा उत्साहजनक सहभागिता देखिएको हो ।
यसअघि चैत्र महिनामा नगरपालिकामा ६५ बर्ष माथि उमेर समूहका नागरिकलाई खोप लगाउँदा निकै न्युन सहभागिता भएकोमा यसपटक भने खोप लगाउन तछाड मछाड गरेको देखिन्थो । गेटा स्वास्थ्य चौकीका इन्चार्ज भक्त विकले अपेक्षा गरेको भन्दा बढी संख्यामा मानिसहरु खोप लगाउन आएको बताए । उनले १ सय ५० खोप उपलब्ध भएको भएपनि मानिसहरु धेरै संख्यामा आउँदा खोप पुगाउन नसकिएको बताए । ‘खोप अभाव भएपछि थप खोप मालाखेती अस्पतालबाट ७५ डोज मगाएर लगाएका थियौ’ उनले भने ‘अहिले मानिसहरुमा खोप प्रतिको चेतना बढेको छ । खोप लगाउन धेरै मानिसहरुले चासो दिएका छन ।’ उनले स्वास्थ्य चौकी मार्फत १ सय ७८ जनाले खोप लगाएको बताए ।
जसमा ६० बर्ष माथिका ५३ जना, स्वास्थ्यकर्मी ३० जना, शुरक्षाकर्मी ११ जना, सरसफाकर्मी १० जना, पत्रकार १३ जना, बैंक तथा बिक्तिय संस्थाका कर्मचारी ५७ जनाले खोप लगाएको स्वास्थ्य चौकीले जनाएको छ । स्वास्थ्य चौकीका इन्चार्ज विकले बुधबार पनि खोप लगाउने भनेको भएपनि खोप भने नआएको बताए । गोदावरीमा मंगलबार ३ वटा केन्द्र मार्फत खोप लगाईएको थियो । तिन वटै केन्द्रमा गरेर पहिलो दिन ५ सय ४८ जनाले कोरोना खोप लगाएको नगरपालिकाको स्वास्थ्य शाखाले जनाएको छ ।
स्वास्थ्य शाखा प्रमुख नवराज अवस्थीले पुरुष ३ सय ५१ जना र महिला १ सय ९७ जनाले खोप लगाएको बताए ।
जसमा गेटा स्वास्थ्य केन्द्रबाट १ सय ७८ जना, मालाखेती अस्पतालबाट ३ सय ६२ जना र गोदावरी स्वास्थ्य केन्द्रबाट ८ जनाले कोरोना खोप लगाएका छन ।
यसअघि पहिलो चरणमा खोप लगाउँदा खोपबारे बिभिन्न भ्रम फैलिएकोले पनि खोप कार्यक्रममा मानिसहरु सहभागि हुन मानेका थिएनन् । तर, पहिलो चरणमा खोप लगाएकामा अहिले कोरोनाको जोखिम कम देखिएपछि खोप प्रति आकर्षण बढेको हो । खोप कार्यक्रममा सहभागि कैलालीको गोदावरी नगरपालिका – १ बिजौराका जेष्ठ नागरिक तपराज पन्तले खोप लगाएपछि सुरक्षित हुने विश्वासले खोप लगाएको बताए । उनले खोप लगाएपछि सुरक्षित भइन्छ भन्ने सुनेर आफू खोप लगाउन आएको बताए । उनले आफू संगै अब बालबालिका, युवाहरुलाई पनि यो खोप लगाउन आवश्यक रहेको बताए।
गोदावरी नगरपालिकामा यसअघि संचालिन खोप कार्यक्रममा ५ हजार ६ सय ९९ जनाले खोप लगाइसकेको नगरपालिकाको स्वास्थ्य शाखाले जनाएको छ । नगरपालिकामा मंगलबार देखि सुरु भएको खोप कार्यक्रम जेठ २७ गते सम्म जारी रहने जनाइएको छ ।
