धनगढी- कैलालीमा लागुऔषधसहित एक जनालाई प्रहरीले पक्राउ गरेको छ। शुक्रबार दिउँसो १ बजे ईलाका प्रहरी कार्यालय टीकापुरबाट खटिएको प्रहरी टोलीले टीकापुर ३ बजिर चौराहस्थित सडकखण्डबाट जानकी गाँउपालिका–७ गोलौरीका १९ बर्षीय राजबिन महतोलाई पक्राउ गरेको हो।
सु.प.प्र.०१-०११ प ११२६ नम्बरको मोटरसाईकलमा सवार उनी टीकापुरबाट गोलौरी तर्फ जाँदै गरेका थिए। उनलाई शंका लागी चेकजाँच गर्दा ज्याकेटको खल्तिमा थान ५ पोका प्लाष्टिकमा ३ सय १० मिलिग्राम लागुऔषध (खैरो हेरोईन) लुकाई राखेको अवस्थामा बरामद गरिएको प्रहरीले जनाएको छ।
बरामद गरिएको लागुऔषध (खैरो हेरोईन) सहित महतोलाई पक्राउ गरि थप अनुसन्धान कार्य भईरहेको ईलाका प्रहरी कार्यालय टीकापुरले जनाएको छ ।
