सुदूरपश्चिम प्रदेशमा भएको राष्ट्रियसभा सदस्य निर्वाचनमा २२४ मतदाता मध्ये २२० जनाले मतदान गरेका छन्। प्रदेश निर्वाचन कार्यालय धनगढीका प्रमुख प्रेमराज भट्टका अनुसार ४९ जना प्रदेशसभा सदस्य र १७१ जना स्थानीय तहका प्रमुख, उपप्रमुख, अध्यक्ष तथा उपाध्यक्ष गरी कुल २२० मत खसेको हो।
कुल मतदाता संख्या २२४ रहे पनि ४ जनाले मतदान गरेनन्। मतदानमा अनुपस्थित हुनेमा नेपाली कांग्रेसका प्रदेशसभा सदस्य प्रकाश देउवा, राप्रपाका प्रदेशसभा सदस्य खेमा बिष्ट, धनगढी उपमहानगरपालिकाका प्रमुख गोपाल हमाल र जोशीपुर गाउँपालिकाकी उपाध्यक्ष रेखा कठरिया रहेका छन्।
महिला समूहबाट एक र अन्य समूहबाट एक गरी दुई जना राष्ट्रियसभा सदस्यका लागि निर्वाचन भइरहेको छ। निर्वाचनमा चार जना उम्मेदवार मैदानमा छन्।
महिलातर्फ एमालेकी लिलाकुमारी भण्डारी र नेकपा (माओवादी केन्द्र) की रोजी बस्नेत उम्मेदवार छन्।
अन्य समूहमा नेपाली कांग्रेसका खम्मबहादुर खाती र नेकपाका टिकाराम जैशी उम्मेदवार रहेका छन्।