कञ्चनपुर- कञ्चनपुरको भीमदत्त नगरपालिका–१० स्थित सशस्त्र प्रहरी बल नेपालको जिमुवा बोर्डर आउटपोष्ट (बिओपी) मा स्थापना भएको पाँच वर्षपछि पूर्वाधार निर्माण सम्पन्न भएको छ । वि.सं. २०७७ असोजमा सीमा निगरानीका लागि स्थापना गरिएको उक्त बिओपीमा हाल आवास, अतिथि गृहसहितका पूर्वाधार निर्माण गरिएको छ ।
सुदूरपश्चिम प्रदेश सरकारले गत आर्थिक वर्षको योजनाअन्तर्गत निर्माण गरेको अतिथि गृह भवन आइतबार आन्तरिक मामिला तथा कानुनमन्त्री हिरा सार्कीले उद्घाटन गरे । उद्घाटन समारोहमा मन्त्री सार्कीले बताए कि, बिओपीमा पूर्वाधार नहुँदा सीमा सुरक्षामा खटिएका प्रहरी आफैँ सुरक्षित हुने अवस्था नरहेकोले प्रदेश सरकारले प्राथमिकताका आधारमा भवन निर्माण गरेको हो। उनले प्रदेश सरकारले प्रहरीलाई सुरक्षा तथा विपद् उद्धारका लागि आवश्यक सामग्री पनि वितरण गरेको जानकारी दिए ।
पूर्वाधार निर्माणले सशस्त्र प्रहरीको आवास व्यवस्थापन सहज हुने बताउँदै मन्त्री सार्कीले सीमा निगरानी, अवैध ओसारपोसार नियन्त्रण र राजस्व छली नियन्त्रणमा सक्रियताका साथ काम गर्न प्रहरीलाई निर्देशन दिए ।
सशस्त्र प्रहरी बल सुदूरपश्चिम प्रमुख प्रदीपकुमार पालले पनि भवन निर्माणले प्रहरीको सेवा प्रवाहमा सहजता आउने बताए । उनले भने, स्रोतसाधनको अभावका कारण प्रहरीले सेवा प्रदान गर्न कठिनाइ भोगिरहेको थियो, त्यसैले सबै बिओपीमा आवश्यक पूर्वाधार निर्माण गर्न सरकारसँग आग्रह गरिएको छ ।
प्रदेश सरकारद्वारा विनियोजित ४० लाख रुपैयाँको बजेटमा २९ लाख ७३ हजार रुपैयाँमा ठेक्का सम्झौता गरी अतिथि गृह भवन निर्माण गरिएको मन्त्रालयका निमित्त सचिव आमोद दहालले जानकारी दिए । उनका अनुसार चालु आर्थिक वर्षमा थप तीन वटा बिओपीमा पूर्वाधार निर्माण गर्ने योजना रहेको छ ।
जिमुवा क्षेत्रमा गत वर्षको संघीय योजनाअन्तर्गत दुई वटा प्रहरी ब्यारेक भवन पनि निर्माण सम्पन्न भएको छ । जिमुवा क्षेत्रको दुर्गम टोल श्रीलङ्कामा रहेको बिओपी यसअघि खानेपानी कार्यालयको भवनमा बस्दै आएको थियो । वर्षादेखि बाढीको उच्च जोखिम रहेको यस क्षेत्रमा भवन निर्माण भएपछि सेवा प्रवाहमा सहजता आउने अपेक्षा गरिएको छ ।
त्यसैगरी शनिवार मात्रै बेलौरीको खड्डाकंकडमा रहेको बिओपी भवन पनि आन्तरिक मामिला तथा कानुनमन्त्री हिरा सार्कीले उद्घाटन गरेका थिए ।
