अत्तरिया- कैलालीको गोदावरी नगरपालिकामा फोहोरमैला व्यवस्थापन केन्द्र निर्माण सम्पन्न भइसकेको छ । अब डेढ महिनाभित्रै केन्द्र पूर्ण रूपमा सञ्चालनमा ल्याइने तयारी छ ।
गोदावरी नगरपालिका–३, चौकीडाँडा महिला सामुदायिक वन क्षेत्रमा निर्माण गरिएको केन्द्र एसियाली विकास बैंक (एडिबि) को ऋण अनुदान सहयोग र नेपाल सरकारको सहकार्यमा, क्षेत्रीय सहरी विकास आयोजना कार्यालय, धनगढीको संयोजनमा निर्माण गरिएको हो । परियोजनाको कुल लागत ५१ करोड ६९ लाख ७४ हजार ४९९ रुपैयाँ रहेको छ । जसमा ७५ प्रतिशत रकम एडिबि र २५ प्रतिशत नेपाल सरकारको लगानी हो।
करिब पाँच हेक्टर क्षेत्रफलमा फैलिएको केन्द्रको निर्माण चीनको सिचुवान प्रोभेन्सियल जियोलोजिकल इन्जिनियरिङ कम्प्लेक्सले गरेको हो । यो केन्द्र तीन वर्षसम्म निर्माण कम्पनीकै व्यवस्थापनमा रहने छ ।
केन्द्रमा दैनिक ८ देखि ९ टनसम्म गोदावरी नगरपालिकाका विभिन्न वडाबाट संकलित फोहोर ल्याइनेछ । संकलित फोहोरलाई वर्गीकरण गरिनेछ—कुहिने फोहोरबाट कम्पोस्ट मल उत्पादन गरिनेछ भने नकुहिने रिसाइकल योग्य फोहोरलाई बिक्री गरिनेछ । यसले वातावरणीय प्रदूषण न्यूनीकरण गर्नुका साथै स्थानीय कृषकलाई जैविक मल उपलब्ध गराउने विश्वास गरिएको छ ।
गोदावरी नगरपालिकाका नगर प्रमुख विरेन्द्र भट्टले भने, हाम्रो नगरलाई सफा, हराभरा र वातावरणमैत्री बनाउने हाम्रो दीर्घकालीन लक्ष्य हो । यो केन्द्रको सञ्चालनले फोहोरमैला व्यवस्थापनमा गुणात्मक सुधार ल्याउनुका साथै स्थानीय जनताको जीवनस्तर उकास्न समेत योगदान पुर्याउनेछ । ’ उनले थपे, हामी डेढ महिनाभित्र आवश्यक कानुनी र प्राविधिक प्रक्रिया पूरा गरेर केन्द्र सञ्चालनमा ल्याउने छौं । अपरेसन व्यवस्थापन, कर्मचारी तालिम, राजस्व संकलन प्रणाली लगायत सबै तयारी तीव्र गतिमा भइरहेको छ ।’
बुधबार भएको समन्वय बैठकमा नगर प्रमुख भट्ट, केन्द्र प्रतिनिधि, निर्माण व्यवसायी र परियोजना संयोजकबीच केन्द्र सञ्चालनका लागि आवश्यक पहलबारे विस्तृत छलफल भएको हो । केन्द्रमा ४० जना भन्दा बढी स्थानीयलाई योग्यता अनुसार रोजगारी दिइनेछ । परियोजनाले प्रत्यक्ष र अप्रत्यक्ष रूपमा स्थानीय आर्थिक गतिविधिमा योगदान पुर्याउने अपेक्षा गरिएको छ ।
निष्कर्षः फोहोरमैला व्यवस्थापनको दीर्घकालीन समाधानका लागि गोदावरी नगरपालिकाले सुरु गरेको यो परियोजना आधुनिकता, दिगोपन र समुदाय सहभागिताको उत्कृष्ट नमूना बन्ने छ । डेढ महिनाभित्र सेवा सुरु हुने सुनिश्चिततासँगै नगर स्वच्छ, हरित र समुन्नत बनाउन अझ बलियो आधार तयार भएको छ ।
