अत्तरिया- सुदूरपश्चिम प्रदेशमा दशैको अवधिमा सडक दुर्घटनाबाट १३ जनाले ज्यान गुमाएका छन् । घटस्थापनाको दिनदेखि असोज ३० गते पूर्णिमा सम्मको अवधिमा भएका २१ वटा सडक दुर्घटनामा परि १३ जनाले ज्यान गुमाएका हुन ।
दुर्घटनामा परि ४६ जना घाइते भएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय अत्तरियाले जनाएको छ। मृत्यु हुनेमा ९ पुरुष, ३ महिला र एक शिशु छन् । त्यस्तै घाइते हुनेमा २५ जना पुरुष, ३ महिला र ३ बालबालिकाको अवस्था गम्भीर रहेको छ । बाँकी १५ जनाको अवस्था मध्यम तथा सामान्य रहेको छ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालयका सूचना अधिकारी ट्राफिक प्रहरी निरीक्षक सुरजबहादुर खड्काले दसैँ अवधिमा प्रदेशका ४ जिल्लामा सवारी दुर्घटना भएको बताए । दसैँ अवधिमा सबैभन्दा धेरै सवारी दुर्घटना कैलालीमा भएका छन् । कैलालीमा १७ वटा सवारी दुर्घटना भएको उनले बताए । उक्त दुर्घटनामा ६ जनाले ज्यान गुमाएका छन् भने २६ जना घाइते भएका छन् ।
यस्तै डडेल्धुरामा भएका २ वटा दुर्घटनामा पाँच जनाले ज्यान गुमाउनुका साथै १४ जना घाइते भएका छन् । जसमा मंगलबार राती भएको बस सवारी दुर्घटनामा मात्रै ५ जनाको मृत्यु भएको थियो भने १२ जना घाइते भएका छन् । दसैँ अवधिमा प्रदेशमा भएको यो नै सबैभन्दा ठुलो दुर्घटना पनि हो ।
त्यस्तै दसैँ अवधिमा भएको सवारी दुर्घटनामा कञ्चनपुर र बझाङमा एक-एक जनाको मृत्यु भएको ट्राफिक प्रहरीले जनाएको छ। सो अवधिमा कञ्चनपुरमा ६ जना घाइते भएका छन् । प्रदेशका अन्य जिल्लामा भने यो अवधिमा दुर्घटना नभएको प्रहरीले जनाएको छ ।
प्रदेशमा दसैँ अवधिमा ७ सय ९२ मोटरसाइकल सहित एक हजार ८५३ सवारी साधन कारबाहीमा परेका छन् । ट्राफिक प्रहरी कार्यालय अत्तरियाका अनुसार उक्त सवारी साधन कारबाहीबाट १३ लाख ५८ हजार रुपैयाँ राजश्व सङ्कलन गरिएको छ ।
गत वर्ष दसैँ अवधिमा सुदूरपश्चिमका विभिन्न जिल्लामा भएका १४ सडक दुर्घटनामा ९ जनाले ज्यान गुमाएका थिए भने ६ जना घाइते भएका थिए । त्यस्तै गत वर्ष २ हजार ३३६ सवारी साधन कारबाहीमा पर्दा ट्राफिक प्रहरीले १५ लाख ४ हजार रुपियाँ राजश्व सङ्कलन भएको थियो ।
