धनगढी– प्रभात मिडिया एण्ड ईभेन्ट प्रा.लि.ले हरेक बर्ष आयोजना गर्ने नृत्य र गायन विधाको सुप प्रदेश स्तरीय कार्यक्रम एसईई आईडलको तेस्रो संस्कारणका अडिसनहरु सुपका तराइका २ जिल्लामा धमाधम आयोजना हुँदैछन् ।
यसै क्रममा मंगलबार धनगढीका २ बिद्यालयमा अडिसनहरु सम्पन्न भएका छन् ।मंगलबार धनगढीको मनेहरामा रहेको डिलाइट ई.बो. स्कुल र पुनरबासको जनकल्याण माध्यमिक विद्यालयमा तेस्रो र भन्सारमा रहेको नवदुर्गा माध्यमिक विद्यालयमा अडिसनहरु सम्पन्न भएका छन् । विद्यार्थीहरुको फरक क्षमता अभिवृद्धिका लागि अडिसन आयोजना गरिएको कुरा डिलाइट ई.बो. स्कुलमा प्रधानाध्यापक शंकर खनालले बताए ।
यसैगरी अर्को अडिसन आयोजक नवदुर्गा माध्यमिक विद्यालयका प्रधानाध्यापक राम कुमार चौधरीले पढाइमा बाधा नपुग्ने गरि यस्ता प्रकारका कार्यक्रम निरन्तर रुपले आयोजना हुनुपर्ने कुरामा जोड दिए । एसईई आइडल ३ का सुपका ९ जिल्लाका ३० बढी स्थानहरुमा अडिसनहरुमा आयोजना गरिनेछ । यस वर्ष एसईई दिने विद्यार्थीहरुले अडिसनमा सहभागी हुन पाउनेछन् ।
यस वर्ष पनि गत बर्ष जस्तै नृत्य र गायन प्रतिभाहरुले आफ्नो प्रतिभा प्रदर्शन गर्न पाउनेछन् । असोज देखि फाल्गुण सम्म सुपमा ९ जिल्ला भरि नै अडिसन प्रतियोगिताहरु संचालन हुनेछन् जहाँबाट नृत्य र गायन विधाका उत्कृष्ट ३०/३० जना प्रतिस्पर्धिहरुले २०८१ बैशाखमा हुने दोस्रो चरणमा प्रवेश पाउनेछन् भने दोस्रो चरणमा उत्कृष्ट हुने नृत्य र गायन विधाबाट १५/१५ जना प्रतिस्पर्धीहरुले २०८१ असार १ गते हुने फाईनलमा प्रवेश पाउनेछन् । फाईनलबाट दुवै विधामा १/१ जना विजेता र १/१ जना उपविजेता बन्नेछन् ।
दुवै विधाका विजेता र उप विजेताले क्रमशः रु ५०/५० हजार र रु २५/२५ हजार सहित कक्षा ११ र १२ मा पूणर् छात्रवृत्ति पाउनेछन् । साथै दुवै विधाका उत्कृष्ट ५ भित्र पर्ने अन्य प्रतिस्पर्धिहरुले कक्षा ११/१२ मा आंशिक छात्रवृत्ति पाउनेछन् ।
थप अडिसन स्थलहरुको खोजी भईरहेकोले यस प्रतियोगिता सहभागी हुन ईच्छुक विद्यार्थी तथा विद्यालयहरुलाई सम्पर्क गर्न आयोजकले अनुरोध गरेको छ । आयोजकले यस भन्दा पहिले पनि २ संस्करणहरु भव्य रुपले आयोजना गरि सकेको छ । मुख्य प्रबर्द्धकका रुपमा प्रदेश युवा परिषद्, सुप रहेको एसईई आइडल ३ मा रेडिकल यस कार्यक्रममा रेडिकल एकेडेमी लगायतका विभिन्न संघसंस्थाको पनि विशेष सहयोग रहेको छ ।
