बैतडी– बैतडीको पुर्चौंडी नगरपालिकाले दुई दिन नगर क्षेत्रभित्र स्थानीय बिदा दिइएको छ । पुर्चौंडी नगरपालिका–१ हाटस्थित प्रसिद्ध त्रिवेणी राताशिला धाममा गिरेगडा कफलखाना जात्रा लाग्ने भएकाले बिदा दिइएको नगरपालिकाले जारी गरेको सूचनामा उल्लेख गरिएको छ ।
पुर्चौंडी क्षेत्रको मुख्य जात्राको रूपमा रहेको कफलखाना गिरेगडा जात्रामा स्थानीयहरूका साथै अन्यत्रका दर्शनार्थीहरु समेत आउने भएकाले दुई दिन सार्वजनिक बिदा दिइएको नगर प्रमुख दीपकबहादुर बमले बताए ।
गिरेगडा कफलखाना जात्राको अवसरमा भोलि बुधवार र पर्सि बिहीबार पुर्चौंडी नगरपालिका क्षेत्रभित्रका सबै सरकारी तथा गैरसरकारी निकाय, शिक्षण संस्था लगायतमा स्थानीय बिदा दिएको नगरपालिकाले जारी गरेको सूचनामा उल्लेख गरिएको छ ।
कफलखाना गिरेगडा जात्राको अवसरमा पुर्चौंडी नगरपालिकाले बिदा दिँदै आएको छ । हरेक वर्ष हरिबोधनी एकादशीको दिन गिरेगडा कफलखाना जात्रा हुँदै आएको छ । सो मन्दिरमा कार्तिक शुक्ल दशमी र एकादशीको दिन मेला लाग्ने गरेको छ । सो मेलामा भकुण्डो खेल्न प्रचलन समेत रही आएको छ ।
यस्तै कफलखाना गिरेगडा मेलाको अवसरमा देउडा कार्यक्रमको आयोजना गरिएको छ । प्रगतिशील युवा क्लबको आयोजना तथा पुर्चौंडी नगरपालिकाको सहयोगमा आज र भोलि देउडा कार्यक्रम सञ्चालनमा रहेको युवा क्लबका अध्यक्ष करनप्रसाद भट्टले जानकारी दिए ।
स्थानीय कला र संस्कृतिको जगेर्ना गर्ने उद्देश्यका साथ देउडा कार्यक्रमको आयोजना गरिएको उनले बताए ।
