बैतडी- दशै तिहार जस्ता राष्ट्रिय चाडपर्वहरू नजिकिँदै गर्दा बैतडीका स्थानीय तहहरू ग्रामीण सडक सफाईमा लागेका छन् । जिल्लाका सबैजसो स्थानियतहले दशैँका लागि घर फर्किने व्यक्तिहरूको सुविधालाई मध्यनजर गर्दै ग्रामीण सडक सफाई गर्न लागेका हुन् ।
जिल्लाको दशरथचन्द नगरपालिकाले बर्षाका कारण अवरुद्ध भएका नगरभित्रका ग्रामीण कच्ची सडकहरू सफा गरि सवारी सञ्चालन गर्न लागेको नगर प्रवक्ता अजव पाण्डेले बताए ।
उनले भने,‘बर्षाका कारण अधिकांश सडकहरू पहिरो गएर अवरुद्ध भएका थिए, अहिले पहिरो पन्छाएर सडक खोल्ने काम गरिरहेका छौँ । ११ वडाहरूमध्ये आधा काम सम्पन्न भएको छ काम जारी छ ।
हामीसँग भएको एक मेसिन र एक अर्को मेसिन भाडामा लिएर काम गरिरहेका छौँ ।’ जिल्लाको पञ्चेश्वर गाउँपालिकाले सबै वडाका सडकहरू सफाई गरिरहेको गाउँपालिका अध्यक्ष गोरख बहादुर चन्दले बताए ।
‘गाउँपालिका भित्रका कुनैपनी ग्रामीण सडक अवरुद्ध हुने बित्तिकै यातायात सञ्चालनका लागि पहिरो हटाउने गर्छौँ, अहिले बर्षाका कारण गएको पहिरोले केही सडकहरू अवरुद्ध भएका थिए यात्रुहरूको सहजताका लागि ती सडकहरू खोल्ने काम गरिरहेका छौँ,’ उनले भने ।
सबै वडाहरूमा यातायात पुगेपछि जिल्लाको दुर्गम मानिएको पञ्चेश्वरका गाउँठाउँमा अहिले गाउँपालिकाले सडक विस्तार गरेको छ । बैतडीका सबै ठाउँका गरि झण्डै २हजार किलोमिटर सडक खनिएको भएपनी ग्रामीण सडकहरू कालोपत्रे हुन सकेका छैनन् ।
जिल्लाको दशरथचन्द राजमार्ग, पाटन–पञ्चेश्वर सडक र सतबाँझ–श्रीभावर सडकखण्ड पूर्ण तथा आंशिक रुपमा कालोपत्रे भएका छन् ।जिल्लाको डिलाशैनी गाउँपालिकाले पालिका केन्द्र धामीगाउँ–मठैराज सम्मको सडक सफा गरि यातायात सेवा सुचारु गरेको छ ।
गाउँपालिकाको वडा नं.१को सडक पनि अहिले सञ्चालनमा रहेको छ । गाउँपालिकामा प्रमुख प्रशासकीय अधिकृत नहुँदा सबै कामहरू प्रभावित भएको पालिका प्रवक्ता यज्ञराज भट्टले बताए ।
उनले भने,‘अहिले दशैँ लक्षित तलव खुवाउनका लागि भन्दै तीन पालिकाको जिम्मा लिएका रघुनाथ अवस्थी सर प्रमुख प्रशासकीय अधिकृतको रुपमा आउनु भएको छ । सडक सफाईमा पनि डिजेल किन्नै मुस्किल छ ।
नगरपालिकाभित्रका सबै अवरुद्ध सडकहरू खुलाएर यात्रुलाई सेवा दिने काम भइहरेको पाटन नगरपालिकाका उपमेयर कमलसिंह बोहराले बताए । अवरुद्ध भएका ठाउँहरूमा मेसिन पठाएर काम भइरहेको उनले बताए ।
ग्रामीण क्षेत्रका बासिन्दाहरूको सुविधाका लागि अहिले हरेक गाउँघरमा कच्ची सडकहरू खनिएका छन् । ती सडकहरू बर्षाका बेला पहिरोले अवरुद्ध हुने गर्दछन् । ग्रामीण सडकहरू खुलाएर स्थानीय तहहरुले चाडपर्वमा घर फर्किने यात्रुहरूलाई सहज बनाइरहेका छन् ।