टीकापुर- कैलालीको दक्षिणी भजनी नगरपालिका-९ आम्बारीको झोलुंगे पुल जोगाउनका लागि स्थानीयहरू जैविक तटबन्ध निर्माणमा जुटेका छन्। नगरपालिकाको वडा नम्बर ९ आम्बारी र वडा नम्बर ४ खैलाडलाई जोड्ने कान्द्रा नदीमा निर्माण गरिएको झोलुंगे पुल जोगाउन स्थानीयहरू जैविक तटबन्ध निर्माण जुटेका हुन्।
स्थानीय होमबहादुर बोहराले ७ महिना अघि निर्माण सम्पन्न भएको कान्द्राको झोलुंगे पुलदेखि उत्तरतर्फ कान्द्रा नदीले कटान शुरु गरेपछि चार दिनदेखि स्थानीयहरू तटबन्ध निर्माणमा जुटेको बताए। ‘नदीले ५ मिटरभन्दा बढी जमिन कटान गरिसकेको छ, बलौटे माटो छ, एकदिन आएको बाढीले नै पुल जोखिममा पर्यो’ बोहराले भने ‘१५ मिटर तल झोलुंगे पुल छ, पुलको दायाँ बायाँ तटबन्ध नहुँदा कटानको जोखिममा परेको हो।’
स्थानीयहरूले नदी नियन्त्रणका लागि कुकाठ, बाँस, झारपातको प्रयोग गरेर बोरामा बालुवा भर्दै जैविक तटबन्ध निर्माण गरिरहेका छन्। वडा नम्बर ९ र ४ का १ शय ५० जनाभन्दा बढी गाउँलेहरूले चार दिनदेखि निरन्तर दैनिक श्रमदान गरेर तटबन्ध निर्माण गरिरहेको वडा नम्बर ९ का अध्यक्ष सञ्जित चौधरीले बताए।
‘९ नम्बर र ४ नम्बर वडाका गरी दैनिक डेढ शयदेखि २ शय बढी गाउँलेहरूले श्रमदान गरिरहेका छौं’ वडाध्यक्ष चौधरीले भने ‘वर्षौंदेखिको गाउँलेको माग रहेको झोलुंगे पुल नै खतरामा पर्ने देखेपछि श्रमदान गरेरै बचाउने प्रयास गरिरहेका छौं।’
वडाध्यक्ष चौधरीले झोलुंगे पुल निर्माण गरिएको क्षेत्रमा तारजालीसहितको तटबन्ध निर्माणका लागि नगरपालिकालाई पहल गर्न अनुरोध गरिएको बताए। नदी नियन्त्रणका लागि दीर्घकालीन योजना नहुँदा बर्सेनि सो क्षेत्रका स्थानीयहरूले नदी कटानको जोखिम मोल्दै आएका छन्।
नदीको कटानका कारण सयौं विघा उब्जाऊ जमिन बालुवामा परिणत भएको स्थानीयहरू बताउँछन्। कैलालीको चुरे क्षेत्रबाट बग्ने कान्द्रा नदीले दक्षिणी क्षेत्रको भजनी नगरपालिकामा कटान गर्दा आम्बारी, गञ्जावा, खैलाड क्षेत्रको जमिनमा क्षति पुग्दै आएको छ।
