कैलाली- कैलाली र कञ्चनपुरमा अवैध ब्रोइलर कुखुरा र माछा बरामद गरिएका छन् । सोमबार दिउँसो प्रहरीले कञ्चनपुरको बेलौरी नगरपालिका–६ भुराकोटमा भारतीय नम्बरका दुई वटा मोटरसाइकलमा ल्याउँदै गरेको अवस्थामा अवैध ब्रोइलर कुखुरा र माछा बरामद गरिएका हुन्।
भारतीय नम्बर प्लेटको युपी ३१ एपी ८६३८ नम्बरको मोटरसाइकलसहित १ सय २० किलो अवैध रूपमा भन्सार छलीका ब्रोइलर कुखुरा बरामद गरिएको प्रहरीले बताएको छ। कुखुरा ल्याइरहेका मोटरसाइकलका चालक भने मोटरसाइकल छोडेर फरार भएका छन्।
प्रहरीका अनुसार मोटरसाइकल र ब्रोइलर कुखुरा गरि कूल ६५ हजार मूल्य बराबरका छन्। बरामद बोईलर कुखुरा स्थानीय जनप्रतिनिधि, सञ्चारकर्मी र बासिन्दाको रोहबरमा नष्ट गरिएका छन्।
त्यस्तै सोमबार दिउँसो नै प्रहरीले कैलालीको भजनी नगरपालिका-३ सरदार चोकमा भारतबाट अवैध रूपमा ल्याइएको अन्दाजी २४ हजार रुपैयाँ मूल्य बराबरको ८० किलो बैखा माछा बरामद गरेको छ।
सुदूरपश्चिम प्रदेश प्रहरी कार्यालय धनगढी र प्रहरी चौकी जनकपुरबाट खटिएको प्रहरी टोलीले सो माछा बेवारिसे अवस्थामा फेला पारेको जानकारी दिइएको छ।