बुटवल- सडक निर्माणको काम अलपत्र परेको स्थानीयले बुटवल उप–महानगरपालिका वडा नं ११ को वडा कार्यालयमा तालाबन्दी गरिदिएका छन्। करिब ४ वर्ष पहिले निर्माण सुरु भएको रंगशालादेखि एमाले चोक सम्मको डेढ किलोमिटर सडक अहिलेसम्म पुरा नभएको भन्दै उनीहरुले वडा कार्यालयमा ताला लगाएका हुन्।
सडकमा खाल्डाखुल्डी, ढल र प्रदुषणका कारण स्थानीय, पैदलयात्रु र सवारीचालकहरुले सास्ती खेप्दै आएको स्थानीयको गुनासो छ। सडक निर्माण सुरु भएको ४ वर्षसम्म पुरा हुन नसकेपछि सम्बन्धित निकायमा पटक पटक ध्यानाकर्षण गराउँदा पनि सुनुवाइ नभएपछि तालाबन्दी गर्न बाध्य भएको स्थानीय हरि प्रसाद कँडेलले बताए।
१२ बजे लगाएको ताला सहमतिपछि ३ बजे खोलिएको थियो। बुटवल ११ का वडाध्यक्ष रामचन्द्र खनालले उक्त सडक सडक डिभिजन मातहत रहेको बताए। उनले सडक छिटो सक्न डिभिजनसँग नगरपालिकाले पहल गर्ने बताएपछि स्थानीयले ताला खोलेका हुन्।