दार्चुला- दार्चुलाको करिब ५४ प्रतिशत घरधुरीमा बिजुलीबत्तीको पहुँच पुगेको छ। पछिल्लो केही दिनयता लेकम गाउँपालिकाको रातामाटा, सर्मोली, बिटोरा, मालिकार्जुन गाउँपालिकाको मल्बाब र नौगाडको सुत्खोलालगायत क्षेत्रमा विद्युत् प्रवाह गरिएबपछि ५४ प्रतिशतमा विद्युत् पहुँच पुगेको हो।
नेपाल विद्युत् प्राधिकरण, विद्युत् वितरण केन्द्र दार्चुलाका प्रमुख मोहनदेव जोशीका अनुसार दार्चुलाको ५३।७० प्रतिशत घरधुरीमा बिजुली बत्तीको पहुँच पुगेको छ। नौवटा स्थानीय तह रहेको दार्चुलाका आठ स्थानीय तहमा राष्ट्रिय प्रसारण लाइनको पहुँच पुगेको छ।
दुर्गम स्थानीय तह अपिहिमाल गाउँपालिकामा हालसम्म कुनै पनि वडामा बिजुली बलेको छैन। अपिहिमालको वडा नम्बर–५, लुम्थी, सौगन्नामा लाइन विस्तार भए पनि ट्रान्सफर्मर जडान गरेर बिजुली बाल्न बाँकी रहेको प्रमुख जोशीले बताए ।
नौगाड गाउँपालिकाको पनि दल्लेख र धुलिगडा क्षेत्रमा मात्रै राष्ट्रिय प्रसारणको विद्युत् लाइन विस्तार भएको छ। केही घरपरिवारले लघुजलविद्युत्, सोलारलगायत वैकल्पिक ऊर्जाका स्रोतको व्यवस्थापन गरे पनि अधिकांश जनता अन्धकारमा बस्न बाध्य छन्।
दार्चुलाको ४६ प्रतिशत जनता अझै पनि राष्ट्रिय प्रसारणको विद्युत्को पहुँचबाहिर रहेका छन्। विद्युत् अभावमा विभिन्न समस्या झेल्नुपरेको र रातिको समयमा अन्धकारमा बस्नुपर्ने बाध्यता रहेको अपिहिमाल गाउँपालिकाका स्थानीय पार्वती ठेकरेले गुनासो गरे । चमेलियालगायत साना–ठूला जलविद्युत् उत्पादन गरेको दार्चुलामा अहिलेसम्म झन्डै आधा घरधुरीमा विद्युतीकरण नै हुन सकेको छैन।
सरकारले चालू आर्थिक वर्षभित्रै सबै स्थानीय तहमा विद्युतीकरण गरिसक्ने लक्ष्य लिएकोमा लक्ष्यअनुसार काम हुन सकेको छैन। विद्युत् कार्यालय र निर्माण व्यवसायीलगायत सरोकारवाला जिम्मेवार नबन्दा दार्चुलामा विद्युतीकरणमा ढिलाइ भइरहेको छ।
सरोकारवालाको ढिलासुस्ती र गैरजिम्मेवारीका कारण विद्युत् विस्तारमा लक्ष्यअनुसार प्रगति हुन नसकेको लेकमका स्थानीय पल्लवराज जोशीले बताउनुभयो। विद्युतीकरण भइसकेको ठाउँमा समेत बेला–बेला विद्युत् सेवा अवरुद्ध हुने गरेको स्थानीयको गुनासो छ।
