गोदावरीमा सेनाको गेट निर्माण विवाद : विद्यार्थीको आवत–जावत प्रभावित

अत्तरिया- गोदावरी नगरपालिका–२ को वनखेत क्षेत्रमा नेपाली सेनाले गेट र तारबार निर्माण गरेपछि स्थानीय समुदाय, नगरपालिका र सुरक्षानिकाय बीच विवाद चर्किएको छ ।

नेपाली सेनाले सो क्षेत्र आफ्नो भोगाधिकारमा परेको १७.५ हेक्टर राष्ट्रिय वन क्षेत्र भएको दाबी गर्दै चारैतिर तारबार लगाएर संरचना निर्माण गरिरहेको छ। सेनाले गत असोजदेखि सो क्षेत्रमा चेकपोष्ट राखी सुरक्षा र संरक्षण कार्य गर्दै आएको हो।

तर सोही क्षेत्रमा रहेको बाटो दुर्गालक्ष्मी बहुमुखी क्याम्पस जाने मुख्य मार्ग भएकाले दैनिक करिब ३ हजार विद्यार्थीको आवत–जावत अवरुद्ध भएको स्थानीयले गुनासो गरेका छन्।

गोदावरी नगरपालिकाका प्रमुख विरेन्द्र भट्टले सेनाले अत्तरिया बसपार्क, लामिताल क्षेत्र र आसपासका स्थान तत्काल खाली गर्नुपर्ने आग्रह गर्दै छलफल भइरहेको बताए ।
तर नेपाली सेनाका पोस्टपति भेषबहादुर बुढाथोकीले भने सेनाले भोगाधिकार प्राप्त क्षेत्रमा तारबार गरेर मात्र संरक्षण गरिरहेको स्पष्ट पारे ।

इलाका प्रहरी कार्यालय मालाखेतीले स्थानीय भोगचलनमा रहेका जमिन सेनाले लिन खोजेपछि सहयोग मागिएको बताएको छ । प्रहरीको दाबी अनुसार सेनाले निर्माण गरेका संरचना विवादास्पद क्षेत्र भित्र पर्ने भएकाले त्याग्नु पर्ने देखिन्छ ।

यसैगरी, दुर्गालक्ष्मी महिला सामुदायिक वन र अत्तरिया क्षेत्रको राष्ट्रिय वन उपभोक्ता समूहले वर्षौंदेखि संरक्षण गर्दै आएको वन क्षेत्रमा सेनाले जबरजस्ती प्रवेश गरेको भन्दै आपत्ति जनाएको छ । स्थानीय समुदायले निजी र सार्वजनिक दुवै भोगचलनमा रहेका जग्गा सेनाले छोड्नुपर्ने माग गर्दै आएका छन् ।

साविक मालाखेती गाविस–७ अन्तर्गत पर्ने सो १७.५ हेक्टर वन क्षेत्र पूर्व–पश्चिम राजमार्ग, दीपायल जाने सडक र जंगललाई समेट्छ । सो क्षेत्रमा करिब एक सय घरधुरी, अत्तरिया बसपार्क र स्थानीय बस्ती अवस्थित छन् ।

विवाद चर्किएसँगै अहिले नगरपालिका, प्रहरी, नेपाली सेना र स्थानीय समुदाय बीच निरन्तर छलफल भइरहेको छ । तर अझैसम्म समाधान नआएको र वार्ता र सहमति आवश्यक रहेको सबै पक्षको बुझाइ छ ।