अत्तरिया- भूमि समस्या समाधान आयोग कैलालीले जिल्लाका भूमिहीन दलित र सुकुम्बासीलाई पहिलो प्राथमिकतामा राखी लालपुर्जा वितरण गर्ने तयारी गरेको छ । आयोगका अनुसार धनगढी उपमहानगरपालिका, गोदावरी नगरपालिका, लम्कीचुहा नगरपालिका, बर्दगोरिया गाउँपालिका र जानकी गाउँपालिकामा भदौ मसान्तभित्र लालपुर्जा वितरण सुरु हुने भएको छ ।
आयोगका अध्यक्ष यज्ञराज उपाध्यायका अनुसार पहिलो चरणमा जग्गा भोगचलन गरिरहेका भूमिहीन दलित र सुकुम्बासीलाई प्राथमिकता दिइएको छ। उनले भने, “नापचाँजको काम लगभग सम्पन्न भएको छ। पुर्जा बनाउने र प्रमाणीकरण गर्ने काम भइरहेको छ। आयोग र स्थानीय तहका कर्मचारी त्यसमा जुटिरहेका छन्।”
उनका अनुसार कैलालीका सबै १३ पालिकामा आयोगले काम गरिरहेको छ। बाँकी तीन पालिकामा पनि छिट्टै नापजाँच सम्पन्न गर्ने जानकारी दिए। सीमित स्रोत र कर्मचारीको अभावबीच पनि आयोगले कामलाई तीव्रता दिएको उनले बताए।
जिल्लाभरबाट हालसम्म १ लाख ४० हजार ३५८ निवेदन आयोगमा दर्ता भएका छन्। जसमा भूमिहीन दलितका ७ हजार ६३१, भूमिहीन सुकुम्बासीका १३ हजार ९१४ र अव्यवस्थित बसोबासीका १ लाख १८ हजार ८१३ निवेदन रहेका छन्।
यस्तै, अघिल्लो आयोगका अपूरा कामलाई निरन्तरता दिने अधिकारसमेत यस आयोगलाई दिइएको छ। सोहीअनुसार हालसम्म ५ हजार २१४ परिवारका फाइल प्रविष्ट भएको अध्यक्ष उपाध्यायले जानकारी दिए।
