कञ्चनपुर । सुदूरपश्चिम विश्वविद्यालयका विद्यार्थीहरू विश्वविद्यालयको बेथिति, लापरबाहीविरुद्ध अदालत पुगेका छन्। विद्यार्थीले न्यायको माग गर्दै विश्वविद्यालयविरुद्ध अदालतमा रिट दर्ता गरेका हुन्। सोमबार विश्वविद्यालयसहितका कार्यालयलाई विपक्षी बनाएर सुदूरपश्चिम विश्वविद्यालयकै कानुन संकायका विद्यार्थीले उच्च अदालत दिपालय महेन्द्रनगर इजलासमा रिट दर्ता गराएका हुन्।
विद्यार्थीले माध्यमिक शिक्षा (प्लस टू) पछि पढाइ हुने पाँचवर्षे बिएएलएलबी कोर्ष विश्वविद्यालय प्रशासनको लापरबाहीका कारण बढी समय व्यतीत हुने भन्दै रिट दर्ता गराएका छन्। उनीहरूले पाँच वर्षको कोर्ष समयमै सम्पन्न गर्न माग गर्दै मुद्दा हालेको जनाएका छन्। साथै, बिएएलएलबी सातौँ सेमेस्टरको यसै वर्ष कात्तिकमा हुनुपर्ने परीक्षा फागुनसम्म समेत नभएको विषयलाई जिकिर लिँदै उक्त परीक्षा १३ फागुनभित्र सम्पन्न गर्न आदेश मागसमेत गरेका छन्।
विद्यार्थी महेशसिंह साउद, गणेश सार्की, जीवननाथ योगी, गौरवनाथ योगी, नवीन भट्ट, राजु रावत, नरेन्द्रराज जोशी, भीमदत्त भट्टसहितका विद्यार्थीले दायर गरेको रिटमा सुदूरपश्चिम विश्वविद्यालयका उपकुलपति, रजिस्टारको कार्यालय, विश्वविद्यालयको परीक्षा नियन्त्रण कार्यालय, विश्वविद्यालयको कानुन संकायको डिन कार्यालय, सुदूरपश्चिम विश्वविद्यालय कानुन संकाय बिएएलएलबी प्रोग्राम महेन्द्रनगर तथा कैलाली बहुमुखी क्याम्पस धनगढी कैलालीलाई विपक्षी बनाएर मुद्दा दायर गरेका छन्।
यसअघि विद्यार्थीले आफ्ना माग पूरा गराउनका लागि तालाबन्दीदेखिका सडक आन्दोलन गर्दै आए पनि सम्भवत पहिलोपटक न्यायालय पुगेको दाबी गरिएको छ। विश्वविद्यालयको लापरबाही, बेथितिविरुद्धमा विद्यार्थीले आन्दोलनको नयाँ शैली अपनाएका छन्। विश्वविद्यालयका रजिस्ट्रार यज्ञराज पाठकले परीक्षादेखिका रिजल्टसम्मका सबै कार्य समयतालिकाअनुरूप भइरहेको दाबी गर्दै जनशक्ति अभावले कहिलेकाहीँ परीक्षाफल प्रकाशनमा ढिलाइ भएको बताए।
