धनगढी- धनगढी उपमहानगरपालिकाका मेयर गोपाल हमाललाई एक जनाले ज्यान मार्ने धम्की दिएका छन् । मेयर हमाललाई ह्वाट्सएपमा म्यासेज र कल गर्दै एक जनाले धम्की दिएको बताइएको जिल्ला प्रहरी कार्यालय कैलालीले जनाएको छ ।
डीएसपी कुलदिप चन्दले स्थानीय राना थरका एक व्यक्तिले आफूलाई खबरदार भन्दै ज्यान मार्ने धम्की दिएपछि मेयर हमालले प्रशासनमा निवेदन दिएको बताए । उनका अनुसार जिल्ला प्रशासन कार्यालय मार्फत निवेदन जिल्ला प्रहरी कार्यालयमा पुगेको छ । ह्वाट्सएपमा कल गर्दै राना थरका व्यक्तिले ज्यान मार्ने धम्की दिएका हुन् । उसले मेयर सापलाई खबरदार भन्ने लेखेको रहेछ डीएसपी चन्दले भने।’
मेयर हमालले आफूलाई राति ज्यान मार्ने धम्की दिएको जनाएका छन् तर उनले धम्की दिनेको नाम भने निवेदनमा नखुलाएको बुझिएको छ । यस्तै डीएसपी चन्दले धम्की दिने राना अहिले कैलालीकै बौनिया एरियामा रहेको र चाँडै सम्पर्कमा आउने बताए ।
प्रहरीका अनुसार रानाले आफु लम्की पुगेको र आजै प्रहरीमा आउने बताएका छन् । डीएसपी चन्दले भने, ‘रानाले लिन आउनु पर्दैन भने पनि हामीले उच्च निगरानीमा राखेर सुरक्षा प्रबन्ध गरेका छौँ ।’ धम्की दिनुको कारण भने खुलेको छैन् ।
