बैतडी- नेकपा (एमाले)ले बैतडीको झुलाघाटबाट मध्यपहाडी लोकमार्गमा संकल्प यात्रा गर्ने भएको छ। पार्टीका अध्यक्ष तथा पूर्वप्रधानमन्त्री केपी शर्मा ओलीले मंसिर १४ गते बैतडीको झुलाघाट आएर यात्राको सुरुवात गर्ने कार्यक्रम तय भएको छ।
एक हजार ७ सय ७९ किलोमिटर लामो मध्यपहाडी लोकमार्गमा १४ गतेबाट संकल्प यात्रा सुरु हुने एमालेका पोलिटब्युरो सदस्य तथा सुदूरपश्चिमका निवर्तमान मुख्यमन्त्री राजेन्द्र रावलले बताए। ‘सम्बन्ध स्थानीय, सन्देश राष्ट्रिय’ भन्ने नाराका साथ उक्त यात्रा सुरु हुने उनले बताए।
भारतीय सीमानाका तथा मध्यपहाडी लोकमार्गको पश्चिमी विन्दु झुलाघाटबाट पाँचथरको चियो भन्ज्याङसम्मको यात्राका लागि स्थानीयस्तरमा तयारी सुरु भएको छ। शुक्रबार बसेको पार्टीको जिल्ला कमिटी बैतडीले बिभिन्न १० वटा उपसमितिहरू गठन गरेको छ।
एमाले केन्द्रीय सदस्य तथा बैतडी इन्चार्ज निरू पालको संयोजकत्वमा आर्थिक व्यवस्थापन समिति, केन्द्रीय सदस्य लीलाधर भट्टको संयोजकत्वमा जनपरिचालन समिति, पार्टीका सुदूरपश्चिम कमिटीका निवर्तमान अध्यक्ष दामोदर भण्डारीको संयोजकत्वमा आवास समिति र पार्टी प्रवेश समिति गठन गरिएको छ।
त्यस्तै, पार्टी पोलिटब्युरो सदस्य राजेन्द्र रावलको संयोजकत्वमा खाद्यान्न समिति र अभिनन्दन, सम्मान तथा समसामयिक प्रस्ताव समिति गठन गरिएको छ। त्यस्तै, पुष्करराज जोशीलाई मञ्च व्यवस्थापन समिति, जानकी अवस्थी अतिथि सत्कार समिति, रामप्रसाद अवस्थी सांस्कृतिक व्यवस्थापन समिति र चक्र कार्कीलाई स्वयंसेवक परिचालन समितिको जिम्मा दिइएको छ।
१० वटै समितिहरूले मंसिर १ गतेबाट तयारी सुरु गर्ने बताइएको छ। जसअनुसार झुलाघाट र बैतडी सदरमुकाममा जनसभाका लागि मञ्च निर्माण, अनारखोली, खोड्पे, पाटन, सतबाँझ, गोठालापानी र झुलाघाटमा गेट निर्माण तथा पाँच हजार झन्डा, १० हजार निमन्त्रणा कार्ड तथा तीन सय स्वयंसेवक परिचालन गरिने पार्टीकी बैतडी इन्चार्ज निरू पालले जानकारी दिइन्।
२० हजार जनाको सहभागितासहित मध्यपहाडी लोकमार्ग संकल्प यात्राको शुभारम्भ हुने बताइएको छ। जसका लागि जिल्लाभरिका कार्यकर्ताहरूलाई सदरमुकाम, पाटन, सतबाँझ र देहिमाडौँका होटेलहरू तथा सदुरमुकामनजिकका गाउँहरूमा ‘होम स्टे’ निर्माण गरेर बसालिने आवास समितिका संयोजक भण्डारीले जानकारी दिए।
