बैतडी- सुदूरपश्चिम प्रदेशका आन्तरिक मामिला तथा कानुनमन्त्री शिवराज भट्टले संघीयता सफल बनाउन प्रदेश सरकार बलियो हुनुपर्ने बताएका छन्।
नेपाल प्रेस युनियन बैतडीले बुधबार गोठलापानीमा आयोजना गरेको पत्रकार सम्मेलनमा बोल्दै मन्त्री भट्टले संघीयताको सफल कार्यान्वयनका लागि प्रदेश सरकार बलियो हुनु आवश्यक रहेको बताए।
उनले भने, ‘प्रदेशलाई अधिकार सम्पन्न बनाए मात्रै संघीयता सफल कार्यान्वयन हुन्छ। संघीयताको सफल कार्यान्वयनका लागि प्रदेश सरकार बलियो हुन आवश्यक छ। संघीय सरकारले पनि बनाउनुपर्ने कानुन समयमा नबनाउँदा प्रदेश सरकारलाई अप्ठ्यारो भएको छ।’
मन्त्री भट्टले कानुनको अभावमा विभिन्न काम गर्न अप्ठ्यारो भइरहेको बताउँदै आफ्नो ध्यान प्रदेशका कानुन निर्माणमा केन्द्रित रहेको बताए। उनले भने, ‘कानुन नबन्दा धेरै काम गर्न सकिएको छैन, अबको ध्यान सबै कानुन निर्माणमै केन्द्रित छ।’
आन्तरिक मामिला तथा कानुन मन्त्रालयले गृह र सञ्चार मन्त्रालयको समेत काम गर्ने भए पनि त्यसका लागि आवश्यक संरचना र कर्मचारीको अभाव रहेको बताए। यसका साथै मन्त्री भट्टले समग्र विकासका लागि आफू सधैँ लागिपर्ने बताउँदै बैतडीमा दुई वर्षभित्र विद्युतीकरण भइसक्ने दाबी गरे।
जिल्ला अस्पताल बैतडीमा दरबन्दीअनुसारका डाक्टरको व्यवस्थापनका लागि संघीय स्वास्थ्यमन्त्रीसँग कुराकानी गरेको बताउँदै मन्त्री भट्टले अस्पतालमा जनशक्तिको व्यवस्थापनका लागि पहल गर्ने बताए।
मेलौलीमा इलाका प्रशासन कार्यालय, इलाका प्रहरी कार्यालय स्थापना र खानेपानी समस्या समाधानका लागि पहल भइरहेको मन्त्री भट्टले बताए। मन्त्री भएपछि सोमबार पहिलोपटक गृहजिल्ला बैतडी पुगेका मन्त्री भट्ट विभिन्न कार्यक्रममा व्यस्त छन्।
