बैतडी- भारतको उत्तराखण्ड प्रदेशको पिथौरागढ जिल्लामा रहेको धौलीगंगा जलविद्युत परियोजनाको बाँध खोलिएको छ। आज बिहान ५ बजे खोलिएको बाँधका कारण महाकाली नदीको जलस्तर बढेको बैतडीका प्रमुख जिल्ला अधिकारी सुरेश पन्थीले जानकारी दिए।
बेलुका ८ बजेसम्म खोलिने बाँधका कारण जलस्तर बढेकाले सतर्कता अपनाउन आग्रह गरिएको पन्थीको भनाइ छ। उनले भने, ‘ बाँध खोलेपछि महाकाली नदीको सतह बढेको छ, तर क्षतिको कुनै खबर आएको छैन।’
दार्चुलाका प्रमुख जिल्ला अधिकारी किरण जोशीले महाकाली नदीमा निरन्तर रुपमा पानीको बहाव बढेको र भारततर्फ क्षति पुग्न थालेको बताए। उनले भने,’नेपालतर्फ (दार्चुला) मा कुनै क्षति भएको छैन्, भारततर्फको खोटिलाभन्दा माथि कटान भइरहेको छ। केही घरहरुमा क्षति पनि पुगेको छ।’
एनएचपीसी लिमिटेड, धौलीगंगा पावरस्टेसन, धारचुला, पिथौरागढ भारतले दुई दिन पहिला नै आज बाँध खोलिने भनेर पूर्व सूचना तथा जिल्ला प्रशासन कार्यालयलाई पत्र पठाएको थियो।
वर्षातका कारण परियोजनाको जलाशयमा पानीको प्रवाह दिनप्रतिदिन वृद्धि हुँदै गएको र सरसफाईका लागि बाँध खोलिएको जनाएको छ।
दार्चुला देखि बैतडी, डडेल्धुरा, कञ्चनपुर भएर भारततिर बग्ने महाकालीमा पानीको बहाव र सतह बढ्न सक्ने भएका कारण नदी छेउछाउमा नजान र सतर्कता अपनाइ राख्न स्थानीय प्रशासनले अनुरोध गरेको हो ।
धौलीगंगा जलविद्युत परियोजनाको बाँध वर्षातको बेला हरेक वर्ष खोलिने गर्दछ। परियोजनाको बाँध खोल्नुपूर्व सतर्कताका लागि जानकारी गराउने गरेको छ।
वि सं २०७० असार २ र ३ गते एक्कासी धौलीगंगाको बाँध खोलेपछि दार्चुला सदरमुकाममा सयभन्दा बढी घर बगाउनुका साथै अर्बौँ रुपैयाँको क्षति भएको थियो।
