कैलाली- कैलालीको घोडाघोडी नगरपालिकामा निर्माण सम्पन्नको चरणमा रहेको सडकमा गरिएको कालोपत्रे कमसल भएको आरोप लगाउँदै स्थानीयले सडक अनुगमनको माग राखेका छन्।
घोडाघोडी नगरपालिका–४ स्थित सिम्थरीदेखि गैँडाखेडा जाने एक हजार ७२५ मिटर लामो सडकको कालोपत्रे तथा निर्माण कार्य अन्तिम चरणमा पुगेको छ। दुई सय मिटर सडक कालोपत्रे हुन बाँकी रहँदा स्थानीय जनज्योति युवा क्लबले असार ४ गते वडा कार्यालयलाई सडक अनुगमनको माग राख्दै लिखित निवेदन दिएको छ।
वडा नम्बर ४ का पूर्ववडाध्यक्ष टेकबहादुर बुढाले आफ्नो कार्यकालमा टेन्डर भएर निर्माण सुरु भएको उक्त सडक ठेकेदारको लापरबाहीका कारण एक वर्षसम्म काम रोकेर चालु आर्थिक वर्षमा हतार हतारमा निर्माण हुन थालेको बताए । उनले सडकको सबै भाग बराबर नभएको, कालोपत्रे पातलो हालेको र त्यसमा पनि प्राविधिक बुटि गरी ठेकेदारले बदमासी गरेको आरोप लगाए । उनले प्राविधिकसहित सडक अनुगमनको खाँचो रहेको बताए ।
२०७४ सालमा टीकापुरको जयगौरी निर्माण कम्पनीका सञ्चालक तपेन्द्र शाहलाई छ महिनाभित्र निर्माण कार्य सक्ने गरी सो सडक कालोपत्रेको जिम्मा दिइएको थियो। जनप्रतिनिधि आइनसकेको तत्कालीन समयमा ठेक्का लिएका शाहले कोलोपत्रेका लागि बेस तयार गरेर काम अलपत्र छोडेका थिए।
करिब २८ लाख रुपियाँ पेस्की लिनुभएका शाहले लामो समय काम रोकेपछि नगरपालिकाले चार पटकसम्म म्याद थप गरेर निर्माण गर्न ताकिता गरेको थियो। पटक पटक म्याद थप गर्दा समेत ठेकेदारले वास्ता नगरेपछि आर्थिक वर्ष २०७७/७८ मा पुनः टेन्डर प्रक्रियाबाट धनगढीको टेडी निर्माण सेवा प्रालिका सञ्चालक डिलबहादुर ओलीले निर्माणको जिम्मा पाएका थिए।
घोडाघोडी नगरपालिका योजना शाखाका प्राविधिक नवीन मल्लले टेडी निर्माण कम्पनीले सिम्थरी–गैँडाखेडा सडक कालोपत्रे लगायत अन्य तीन ठाउँको सडक कालोपत्रेको जिम्मा पाएको बताए । उनका अनुसार सिम्थरी–गैँडाखेडा एक हजार ७२४ मिटर, डोकेबजार–देउकलिया एक हजार पाँच सय मिटर, पहलमानपुर डिभिजन वनदेखि बुलबुले जाने एक हजार पाँच सय मिटर र वडा नम्बर १ र ८ जोड्ने एक हजार ३८५ मिटर कालोपत्रे सडक निर्माणको जिम्मा टेडी निर्माण सेवाले पाएको छ।
२०७९ चैत मसान्तसम्म निर्माण गर्ने सम्झौता भए पनि आर्थिक वर्षभित्र पूरा गर्ने गरी म्याद थप भएको जनाउँदै इन्जिनियर मल्लले सबै सडक निर्माण ठेक्काको लागत रकम दुई करोड नौ लाख भएको बताए ।
कमसल सडक निर्माणको बारेमा भर्खरै मात्र जानकारी आएकाले एक दुई दिनभित्र सबै ठाउँमा पुगेर अनुगमन गर्नेसमेत मल्लले जानकारी दिए । निर्माण कम्पनीका सञ्चालक ओलीले कालोपत्रे सडक निर्माणकै क्रममा रहेको जनाउँदै कहीँ कतै कमी कमजोरी भएको छ भने सुधार गर्ने प्रतिबद्धता जनाए । गोरखापत्रबाट