धनगढी- कैलालीका किसानले खडेरीमै रोपाइँ थालेका छन् । सबैतिर रोपाइँ सुरु भएपछि कामदार नपाइने कारणले मनसुनी पानी नपर्दै कतिपय किसानले रोपाइँ थालेका हुन् । अहिले कैलालीसहित तराईमा चर्को गर्मी छ । उखरमाउलो गर्मीको पनि परवाह नगरेर किसानले खेतमा रोपाइँ गरिरहेका छन् । बोरिङमार्फत सिँचाइ गरेर रोपाइँ गरिरहेको उनीहरूको भनाइ छ ।
‘सबैतिर रोपाइँ सुरु भएमा पछि कामदार पाइँदैन,’ धनगढी उपमहानगरपालिका–६ जालीका कृषक रामप्रसाद चौधरीले भने, ‘पछि कामदार नपाइने डरले डिजल जति खर्च भए पनि जेठमै रोपाइँ ग(यौँ ।’ उनले एक बिघा जमिनमा रोपाइँ सकिसकेको जानकारी दिए ।
गतवर्ष चाँडै मनसुन पुगेका कारण असारमा किसानले धमाधम रोपाइँ सुरु गरिसकेका थिए तर यो वर्ष अझै पानी परेको छैन । खेतमा धुलो उड्दैछ । जेठ अन्तिम साताबाट रोपाइँ गर्ने गरी ब्याड राखेका धेरैजसो किसान वर्षाको पर्खाइमा छन् तर बढी जग्गा जमिन भएका वा कामदारको भरमा रोपाइँ गर्ने किसानले सुक्खामै रोपाइँ सुरु गरिसकेका छन् ।
ब्याड तयार भएकाले रोपाइँ थालेको कैलारी गाउँपालिका–७, मोहनपुरका आरडी पल्परियाले बताउनुभयो तर पानी नपर्दा किसानलाई समस्या रहेको उनको भनाइ थियो । बोरिङको भरमा रोपाइँ गर्ने उनले उल्लेख गरे । कैलालीमा चैतेभन्दा बर्खे धानको खेती बढी हुने गर्दछ । जिल्लाको भजनी, जोशीपुर, टीकापुरलगायतका पालिकामा कतिपय किसानले चैतेधान खेती गर्दै आएका छन् ।
सो क्षेत्रमा बाढीको समस्या हुने गरेकाले बर्खे धानको रोपाइँ पनि चाँडै हुने गरेको छ । तर पानी नपरेकाले यस वर्ष अहिलेसम्म फाटफुट किसानले मात्रै रोपाइँ सुरु गरेको भजनी नगरपालिका–३ का वडाध्यक्ष विक्रम चौधरीले बताए ।
सुदूरपश्चिम प्रदेशको अन्न भण्डार मानिने कैलालीमा धान प्रमुख बाली हो । यहाँ कुल ८९ हजार ९३५ हेक्टर कृषियोग्य जमिन रहेको छ । जसमध्ये ७० हजार ४०५ हेक्टर जमिनमा धान खेती हुने गरेको कृषि ज्ञान केन्द्र कैलालीका सूचना अधिकारी एवं कृषि प्रसार अधिकृत जनकराज बोहराले जानकारी दिए । गत वर्ष यो जिल्लामा प्रतिहेक्टर ४.७ टनको दरले धान उत्पादन भएको थियो ।