दार्चुला- ब्यास गाउँपालिकाको सुन्सेरामा सशस्त्र प्रहरीको बोर्डर आउट पोस्ट ९बीओपी० स्थापना गरिएको छ । सईको कमाण्डमा ब्यास गाउँपालिकाको केन्द्र सुन्सेरामा सोमबार बीओपी स्थापना भएको हो । हाल बीओपी भाडाको घरमा रहनेछ । जहाँ सशस्त्र प्रहरी नायव निरीक्षकको कमाण्डमा २० जनाको संख्यामा सशस्त्र प्रहरी रहने बताइएको छ ।
ब्यास गाउँपालिकाका अध्यक्ष मंगलसिह धामी, सशस्त्र प्रहरी ७ नम्बर वाहिनीका सहायक वाहिनीपति किरण ढुङ्गाना र प्रमुख जिल्ला अधिकारी किरण जोशीले संयुक्त रुपमा सोमबार बीओपी उद्घाटन गरेको ४४ नम्बर गणका गणपति डम्बरबहादुर बिष्टले बताए ।
सुन्सेराको बीओपीले महाकाली तटीय क्षेत्रको सीमा सुरक्षासँगै ब्यास गाउँपालिकाको हुतीदेखि मालसम्मको क्षेत्र हेर्नेछ । साथै यही बीओपीबाट ब्यास गाउँपालिका–४ स्थित मल्घट्टेमा रहेको नेपाल–भारत जोड्ने झोलुङ्गे पुल र आसपासको क्षेत्र हेरिने गणपति बिष्टले जानकारी दिए ।
बीओपी स्थापनाका लागि जिल्ला सुरक्षा समितिले करिब तीन वर्षअघि माग गरेको थियो । यसअघि ब्यास गाउँपालिकाको छाङ्रुमा सशस्त्र प्रहरीको गुल्म र ब्यास गाउँपालिका–२ को दुम्लिङ्मा बीओपी संचालनमा रहेका छन् ।
जिल्ला सुरक्षा समितिले ब्यास गाउँपालिकाको त्रिदेशीय सीमा जोडिएको कौवा र चीनसित सीमा जोडिएको तिंकरमा पनि बीओपी स्थापनाका लागि माग गरेको छ । तिंकरमा गत वर्ष नै बीओपी भवन निर्माण भए पनि अहिलेसम्म स्थापना भएको छैन ।