कञ्चनपुर,१७ पुस– अखिल नेपाल फुटबल सङ्घ ’एन्फा’ को वार्षिक कार्यतालिका अनुसार सञ्चालन हुने कञ्चनपुर जिल्ला लिग फुटबल प्रतियोगिताको खेल तालिका सार्वजनिक गरेको छ । शनिवार कञ्चनपुर जिल्ला फुटबल सङ्घका अध्यक्ष गणेश बहादुर चन्दको अध्यक्षतामा बसेको बैठकले खेल तालिका सार्वजनिक गरेको सङ्घका महासचिव रमेश चन्दले बताए ।
जिल्ला लिग फुटबल प्रतियोगितामा जिल्ला फुटबल सङ्घमा आबद्ध क्लब मध्य १२ क्लबले सहभागिता जनाएको र क्लबका प्रतिनिधिको उपस्थितिमा गोला प्रथाको आधारमा खेल तालिका सार्वजनिक गरिएको जिल्ला लिग संयोजक चन्द्र सिंह थलालले बताए ।
सङ्घमा आबद्ध दुई क्लबको भने सहभागिता नरहेको र जसमा जनसेवा समिति र ग्यालेक्सी क्लब दैजी रहेका छन् । लिग संयोजक चन्द्रका अनुसार समूह ’ए’ मा डिफेन्डिङ जिल्ला लिग च्याम्पियन क्लब दिपज्योती युवा क्लब, द ग्यालेक्सी युवा क्लब, सेक्युर्ड नेपाल, राम युवा क्लब, यूथ क्लब अफ महाकाली र अरनिको युवा क्लब रहेका छन् भने समूह ’बि’ मा कञ्चन समाज, रोयल गोर्खाज यूथ सर्कल,निङ्गलाशैनी युवा समाज, त्रिपुरा समाज, महेन्द्रनगर युनाइटेड र आदर्श नेपाल रहेका छन् ।
प्रतियोगिता यही पुस २२ गते देखि महेन्द्रनगरको खुलामञ्चमा सञ्चालन हुने छ । लिगको उद्घाटन खेल जिल्ला लिग डिफेन्डिङ च्याम्पियन क्लब दिपज्योती र द ग्यालेक्सी युवा क्लब बिच हुने भएको छ ।
