बाजुरा, २८ कार्तिक- जिल्लाको पुर्वी उत्तरी भेगको बुढीनन्दा नगरपालिकामा भीरबाट लडेर एक महिलाको मृत्यु भएको जिल्ला प्रहरी कार्यालय बाजुराले जनाएको छ ।
मृत्यु हुनेमा सोही नगरपालिका वडा नं. २ कोल्टीकी ४२ वर्षीया जनदेवी खत्री रहेको जिल्ला प्रहरी कार्यालय बाजुराका प्रहरी निरिक्षक बलेन्द्र नाथले जानकारी दिएका छन् । उनले दिएको जानकारी अनुसार आइतबार विहान ८ः०० बजे खेतबाट घर फर्किने क्रममा दानसाँगु भीरबाट लडेर घटनास्थलमै खत्रीको मृत्यु भएको बताएका छन् । मृतक खत्रीको पोष्टमार्टमका लागि प्राथमिक स्वास्थ्य केन्द्रमा शव राखिएको प्रहरी निरिक्षक नाथले बताए ।
शवको पोष्टमार्टम पछि आफन्तलाई बुझाउने प्रहरी निरिक्षक नाथको भनाई रहेको छ । दानसाँगुको भीरबाट करिव एक सय १० मिटर तल खसेर खत्रीको घटनास्थलमा मृत्यु भएको हो । मृतक खत्रीको आजै हिन्दु परम्परा अनुसार दाहसंस्कार गरिने पारिवारिक स्रोतले जनाएको छ।