कञ्चनपुर- जिल्ला कञ्चनपुर शुक्लाफाँटा नगरपालिका–८ बेल्डाडी भित्री सडक खण्डमा मिति २०८३/०१/३१ गते दिउँसो अन्दाजी १४:५५ बजे सवारी दुर्घटना भएको जानकारी प्राप्त हुनासाथ इलाका प्रहरी कार्यालय झलारीबाट प्रहरी टोली खटिई १५:१० बजे घटनास्थल पुगेको थियो।
प्रहरीको प्रारम्भिक अनुसन्धान अनुसार दोमिल्लाबाट बेल्डाडी तर्फ जाँदै गरेको से २ त १४१८ नम्बरको ट्याक्टर चालक जिल्ला कञ्चनपुर कृष्णपुर नगरपालिका–१ बस्ने सन्देश खड्काले चलाइरहेको अवस्थामा ट्याक्टर आफैँ अनियन्त्रित भई पल्टिएको थियो।
दुर्घटनामा चालक खड्काको टाउको, छाती तथा खुट्टामा गम्भीर चोट लागेको थियो । घाइतेलाई उपचारका लागि महाकाली प्रादेशिक अस्पताल महेन्द्रनगर, कञ्चनपुर पठाइएकोमा उपचारकै क्रममा सोही दिन १६:१५ बजे मृत्यु भएको प्रहरीले जनाएको छ। दुर्घटनाग्रस्त ट्याक्टर घटनास्थलमै रहेको छ भने घटनाबारे थप अनुसन्धान भइरहेको प्रहरीले जनाएको छ।
