धनगढी- कैलाली र कञ्चनपुरका सीमा क्षेत्रमा सुरक्षा व्यवस्था थप प्रभावकारी बनाउन सशस्त्र प्रहरीले अतिरिक्त जनशक्ति परिचालन गरेको छ। सशस्त्र प्रहरी बल नेपाल नम्बर ७ वैद्यनाथ बाहिनी मुख्यालय अत्तरिया कैलालीका निमित्त बाहिनीपति एसएसपी दिगविजय सुवेदीका अनुसार दुवै जिल्लामा ९०/९० जनाका दरले कुल १८० जना सशस्त्र प्रहरी खटाइएको हो।
थप गरिएको जनशक्तिलाई ३०/३० जनाको तीन समूहमा विभाजन गरिएको छ। एउटा टोली दिनमा, अर्को टोली रातिको समयमा सीमा क्षेत्रमा खटिनेछ भने तेस्रो टोली आकस्मिक अवस्थामा तयारी अवस्थामा रहनेछ।
कैलालीको धनगढीस्थित नं. ३४ गण हेटक्वाटर र कञ्चनपुरको झलारीस्थित नं. ३५ गण हेटक्वाटरबाट टोली परिचालन गरिएको सशस्त्र प्रहरीले जनाएको छ।
सीमा क्षेत्रमा रहेका गुल्म, बीओपी तथा अन्य युनिटहरूको कामकारबाहीको अनुगमन प्रभावकारी बनाउन, अवैध चोरी–तस्करी नियन्त्रण गर्न र समग्र सीमा सुरक्षा मजबुत बनाउन यो कदम चालिएको हो। साथै, सीमा क्षेत्रमा सम्भावित विपद् जोखिमयुक्त स्थानहरूको अध्ययन तथा विश्लेषण समेत गरिने बताइएको छ।
यसअघि गृहमन्त्री सुधन गुरुङ र सशस्त्र प्रहरी महानिरीक्षक राजु अर्यालले सीमा सुरक्षामा कडाइ गर्न निर्देशन दिएका थिए।
