अत्तरिया- कैलालीको गोदावरी नगरपालिकामा कृषक र जनतालाई विषादी सम्बन्धी सचेतनामूलक कार्यक्रम सम्पन्न भएको छ । कार्यक्रमको अध्यक्षता नगर उप प्रमुख शारदा देवी रोकाया रहेकी थिईन ।
प्रमुख प्रशासकीय अधिकृत धर्म राज विनाडी, वडा नं ११ का वडा अध्यक्ष प्रेम सिंह बडैला, नगरपालिका शाखा प्रमुखहरू, अत्तरियाको कृषि तरकारी तथा फलफूल हाट बजारका अध्यक्ष डिल्ली राज जोशी, एग्रोभेट व्यवसायीहरु, किसानहरू र विषादी प्रयोग शाला विज्ञहरुको उपस्थितिमा कार्यक्रम सञ्चालन गरिएको हो । कार्यक्रममा किसानहरूले प्रयोग गर्दै आएका विभिन्न विषादी, तिनीहरूको उचित प्रयोग समय, मात्रा र मानव जीवनमा पर्ने प्रभावबारे विस्तृत जानकारी प्रदान गरिएको थियो ।
बरिष्ठ बाली संरक्षण अधिकृत महेन्द्रनगरका कोमल शाहीले तरकारी विषादी जन्य सचेतनामूलक कार्यक्रममा कृषकहरूलाई विषादीको सुरक्षित प्रयोगबारे प्रस्तुती दिएका थिए । उनले तरकारी, नगदे, दलहन, अन्न र फलफूल बालीमा प्रयोग हुने विषादीको प्रकार, उचित मात्रा, प्रयोगको समय र मानव स्वास्थ्यमा पर्ने संभावित असरबारे विस्तृत जानकारी प्रस्तुत गरे । साथै, विषादीबाट बाली र वातावरण कसरी सुरक्षित राख्ने, व्यक्तिगत सुरक्षा उपकरणको प्रयोग र विषादीको सही भण्डारण तथा नष्ट गर्ने उपायबारे पनि कृषकहरूलाई व्यावहारिक सुझाव दिएका थिए । प्रस्तुतीले कृषकहरूमा सचेतना र दिगो खेतीतर्फ प्रेरणा दिएको थियो ।
गोदावरी नगरपालिका कृषि शाखा प्रमुख नन्दी मल्लका अनुसार, “हाम्रो पालिकाभित्र प्रयोग भइरहेका विषादी र तिनको नियन्त्रणका प्रयास निरन्तर भइरहेको छ । कृषकहरूलाई सुरक्षित खेतीका उपायहरूबारे जानकारी दिइरहेका छौं । आगामी दिनमा अत्तरिया बजार र पालिकाभित्र रहेका कृषक तथा व्यापारिक केन्द्रमा विषादी नियन्त्रणमा थप पहल गरिनेछ, जसले उत्पादन वृद्धि र स्वास्थ्य सुरक्षामा योगदान पु-याउनेछ ।”
गोदावरी नगरपालिका उप प्रमुख शारदा देवी रोकायाले भनिन्, “कृषकहरूको स्वास्थ्य र सुरक्षालाई प्राथमिकता दिँदै विषादीको जिम्मेवार प्रयोग गर्नुपर्छ । सुरक्षित खेती र बालीको संरक्षणका लागि सचेत रहन आवश्यक छ । पालिका यस सम्बन्धमा लगातार सचेतनामूलक कार्यक्रम सञ्चालन गर्दै आएको छ र भविष्यमा पनि कृषकहरूलाई प्रशिक्षण र सहयोग प्रदान गर्दै दिगो कृषि प्रवद्र्धन गर्ने प्रतिबद्ध छ ।”
गोदावरी नगरपालिका प्रमुख प्रशासकीय अधिकृत धर्म राज विनाडीका अनुसार, “विषादीको दुरुपयोगले मानव स्वास्थ्य र बाली दुवैमा असर पुगाउँछ । कृषकहरूले निश्चित मात्रामा, समयमै र सुरक्षित तरिकाले विषादी प्रयोग गर्नुपर्छ । पालिकाले यसमा सचेतना फैलाउने कार्यक्रम निरन्तर सञ्चालन गर्नेछ । जसले दिगो खेती, वातावरण संरक्षण र किसानहरूको सुरक्षामा योगदान पु-याउनेछ ।’
कार्यक्रमले कृषकहरूलाई सुरक्षित र दिगो खेतीतर्फ अग्रसर गराउने उद्देश्य राखेको छ । विषादीको सही प्रयोग र नियन्त्रणले न केवल बालीको उत्पादन बढाउँछ, तर मानव स्वास्थ्य र वातावरणको सुरक्षा सुनिश्चित गर्न पनि महत्वपूर्ण भूमिका खेल्दछ । यसरी गोदावरी नगरपालिकामा आयोजना गरिएको विषादी सचेतनामूलक कार्यक्रमले कृषकहरूलाई बाली र स्वास्थ्य दुवैको संरक्षणका उपायबारे प्रभावकारी जानकारी दिएको छ ।