अत्तरिया- कैलालीको गोदावरी नगरपालिका–१० खमौराका ३५ वर्षीय शेरबहादुर चौधरी मृत फेला परेका छन् । असोज २३ गते घर नजिकैको ओलानी र गोदावरी नदीको दोभानमा उनको शव भेटिएको हो ।
इलाका प्रहरी कार्यालय मालाखेतीका डिएसपी रणबहादुर चन्दका अनुसार राति छिमेकी लोकेन्द्र मल्ल (लक्की) र उनका भाइ विकास मल्लले घरको ढोका फोड्दै चौधरीलाई मार्ने धम्की दिएका थिए। डरले घरको पछाडिबाट भागेका चौधरी भोलिपल्ट मृत अवस्थामा भेटिएका हुन्।
मृतकका आफन्तले मल्ल दाजुभाइले लखेटी हत्या गरी शव खोलामा फालेको दाबी गर्दै किटानी जाहेरी दिएका छन्। प्रहरीका अनुसार धम्की र ढोका तोडफोडमा संलग्न लोकेन्द्र र विकासलाई नियन्त्रणमा लिइएको छ। घटनाको कारण पोस्टमार्टम रिपोर्टपछि मात्र स्पष्ट हुने प्रहरीले जनाएको छ।