पाकिस्तानले बिहीबार राति भारतको जम्मू, पठानकोट र उधमपुरस्थित सैन्य अड्डाहरूमा मिसाइल र ड्रोन आक्रमण गरेको छ। भारतीय सरकारी टेलिभिजन डीडी न्यूजलाई उद्धृत गर्दै बीबीसी हिन्दीले जनाए अनुसार पाकिस्तानबाट जम्मू क्षेत्रमा मात्र आठवटा मिसाइल प्रहार गरिएको थियो।
सतवारी, सांबा, आरएसपुरा र अर्निया जस्ता संवेदनशील स्थानहरू लक्षित गरिएका थिए। भारतीय वायु रक्षा प्रणालीले ती सबै क्षेप्यास्त्रहरूलाई समयमै अवरोध गरी निष्क्रिय बनाएको रक्षा स्रोतहरूको दाबी छ।
यसबीच, जम्मू–कश्मीरको राजौरी र पुँछ क्षेत्रमा पूर्ण ब्ल्याकआउट गरिएको छ। पुँछमा हवाई साइरनहरू बजिरहेको जनाइएको छ भने पछिल्लो केही घण्टामा पाकिस्तानी गोलीबारीका कारण राजौरी क्षेत्रमा घाइते र मृतकसमेत भएको खबर छ।
भारतीय सेनाले भन्यो, “पाकिस्तानबाट प्रहार गरिएका सबै मिसाइल र ड्रोन हमला हाम्रा सुरक्षा प्रणालीले सफलतापूर्वक विफल पारेको छ। हामी आफ्नो सार्वभौमसत्ता र नागरिकको सुरक्षाका लागि पूर्ण रूपमा सजग छौं ।”