अत्तरिया- कैलालीको गोदावरी नगरपालिकाकी उपप्रमुख एवम् अनुगमन समितिकी संयोजक शारदा देवी रोकायाले आज खुटिया र खैराना नदीको अनुगमन गरेकी छिन् ।
उपप्रमुख रोकायाले प्रमुख प्रशासकीय अधिकृत हरिदत्त भट्ट, इन्जिनियर पूर्ण कुँवर लगायतको टोली सहित खुटिया र खैराना नदीको अनुगमन गरेकी हुन् ।
बुधबार मात्रै नेकपा एमाले गोदावरी नगर कमिटीले खुटिया नदीमा अनुगमन गर्दै मापदण्ड विपरीत नदीजन्य पर्दाथ उत्खनन् भइरहेको भन्दै नगर प्रमुख र उपप्रमुखलाई खबरदारी गरेको थियो ।
उनीहरुले वातावरणीय प्रभाव मुंल्याकन (इआइए) गरिएको ठाँउभन्दा वरैबाट उत्खनन् भइरहेको र अनुमति लिए भन्दा बढी गहिराईसम्म उत्खनन् भइरहेको भन्दै मापदण्ड विपरीत उत्खनन् नगर्न गोदावरी नगरपालिका र ठेकेदारलाई खबरदारी गरेका थिए । तर आज अनुगमनमा गएको टोलीले भने मापदण्ड विपरीत उत्खनन् नभएको निचोड निकालेको छ ।
उपप्रमुख एवम् अनुगमन समितिकी संयोजक रोकायाले मापदण्ड विपरीत उत्खनन् नभएको बताइन् । उनले आफुले नियमित अनुगमन गरिरहेको भन्दै उनले मापदण्ड बमोजि उत्खनन् भइरहेको दावी गरिन् ।
त्यस्तै प्रमुख प्रशासकीय अधिकृत भट्टले मापदण्ड बमोजिम उत्खनन् भइरहेको बताए । उनले सञ्चारमाध्यममा आएजस्तो सत्यता नभएको बताए ।
त्यस्तै कार्यपालिका सदस्य चन्द्रा भुलले नेकपा एमालेले जनुमुदायको तर्फबाट आवाज उठाउनु जायज भएको भन्दै अनुमति बमोजिम उत्खनन् भइरहेको बताईन् ।