काठमाडौं । नेपाल प्रिमियर लिग (एनपीएल) मा उत्कृष्ट प्रदर्शन गर्ने नेपाली खेलाडीले एक थान गाडी पाउने भएका छन्। एनपीएलमा उत्कृष्ट प्रदर्शन गर्ने खेलाडीलाई शारडा समूहले गाडी प्रदान गर्न लागेको हो।
सोसम्बन्धी सम्झौतापत्रमा एनपीएलको व्यावसायिक अधिकार पाएको ब्रान्ड डिजिटल लजिक प्रालिका प्रमुख कार्यकारी अधिकृत रोशन निरौला र शारडा समूहअन्तर्गतको एसपीजी अटोमोबाइल्सका निर्देशक गौरव शारडाले हस्ताक्षर गरेका थिए।
नेपाल क्रिकेट संघ ९क्यान०का सचिव पारस खड्काले नेपाली क्रिकेट इतिहासमै पहिलो पटक खेलाडीले पुरस्कारमा गाडी पाउन लागेको बताए। ‘नेपाली क्रिकेटको इतिहासमै पहिलो पटक खेलाडीले पुरस्कारमा गाडी पाउँदै छन्।
एनपीएल खेलेपछि कम्तीमा खेलाडीले गाडी चढ्नुपर्छ भन्ने लक्ष्यका साथ यो कदम चलेका हौं। यस सहकार्यका लागि शारडा समूहलाई विशेष धन्यवाद दिन चाहन्छु’, सचिव खड्काले भने। उत्कृष्ट खेलाडीले पाउने गाडी भने सार्वजनिक गरिएको छैन। त्यसबारे छिट्टै जानकारी दिने सचिव खड्काले बताए।
एसपीजी अटोमोबाइल्सका निर्देशक गौरव शारडाले यो सहकार्यले नेपालमा क्रिकेटको प्रवद्र्धन र विकासमा महत्वपूर्ण टेवा पुर्याउने विश्वास व्यक्त गरे। ‘क्रिकेटले पछिल्लो समय लोकप्रियता र सफलता पाउँदै गरेको परिदृश्यमा यो सम्झौता क्रिकेटको विकास र विस्तारमा महत्वपूर्ण बन्न सक्छ’, निर्देशक गौरव शारडाले भने। नेपालमा ओमोडा एन्ड जेइको अटोमोबाइल्सको आधिकारिक वितरकका रुपमा एसपीजी अटोमोबाइल्स रहेको छ। एसपीजी अटोमोबाइल्सले ‘ओमोडा एन्ड जेइको’ले एनपीएलको पहिलो संस्करणमा ‘ड्रिभन बाई’ सह प्रायोजकको रूपमा साझेदारी गरेको छ।
प्रतियोगिताको पहिलो संस्करण मंसिर १५ गतेदेखि पुस ६ गतेसम्म कीर्तिपुरस्थित त्रिवि क्रिकेट मैदानमा सञ्चालन हुँदैछ। प्रतियोगितामा आठ टोलीको सहभागिता रहनेछ। जसमा कर्णाली याक्स, सुदूरपश्चिम रोयल्स, पोखरा एभेन्जर्स, जनकपुर बोल्ट्स, काठमाडौं गुर्खाज, चितवन राइनोज, विराटनगर किङ्स र लुम्बिनी लायन्सले प्रतिस्पर्धा गर्नेछन्। प्रतियोगिताको उद्घाटन खेलमा विराटनगर र जनकपुर भिड्ने छन्। प्रतियोगिताको भारतीय टेलिभिजन स्टार स्पोर्ट्सले प्रत्यक्ष प्रसारण गर्नेछ।
