धनगढी- गृहमन्त्री रमेश लेखकले ’नेपाल प्रहरी ऐन २०१२’ सम्बन्धी संशोधनको प्रस्ताव आफ्नो एक सय दिने अवधी भित्र संसदमा पुर्याउने बताएका छन् । बिहीबार धनगढी स्थित प्रदेश प्रहरी कार्यालयमा निर्मित पेट्रोल पम्प र सुदूरपश्चिम प्रदेश प्रहरी गणको भवन उद्घाटन कार्यक्रममा बोल्दै गृहमन्त्री लेखकले प्रहरी सम्बन्धी कानूनको संशोधन अहिलेको प्राथमिकता भएको बताए । ‘केही कानून नयाँ बनाउनुपर्ने छ ।
केही कानूनमा संशोधन र परिमार्जन गर्नुपर्ने छ । २०१२ सालमा बनेको प्रहरी ऐनले अहिले सम्म काम चलाइराखेका छौँ । बीचमा धेरै संशोधन भएर धेरै विषय सम्बोधन भएका छन् । अझै पनि धेरै विषयलाई स्पष्ट गर्नुपर्ने छ,’ उनले भने ।
प्रहरी संगठनलाई थप व्यवस्थित र क्रियाशील बनाउनका लागि प्रहरी ऐनमा संशोधन आवश्यक रहेको गृहमन्त्री लेखकको भनाइ छ । सबै कानूनहरू समसामयिक रुपमा परिमार्जन, संशोधन र पुनरावलोकन गर्न आवश्यक भन्दै विधिको शासनका लागि कानूनमा स्पष्ट व्यवस्था गर्नुपर्ने बताए । ‘कानून व्यवहारिक छैन भने व्यवहारिक बनाउनुपर्यो । कानूनको एउटै सिद्धान्त हुन्छ । भएको कानूनलाई मान्नुपर्यो ।
अव्यवहारिक छ भने संशोधन गर्नुपर्यो । कानूनको संशोधन अहिलेको प्राथमिक विषय हो भन्ने मलाई लागेको छ,’ उनले भने । लेखकले नेपाल प्रहरी र सशस्त्र प्रहरी सम्बन्धित कानुन निर्माणलाई राखेको जानकारी दिए । नयाँ कानुनमा नेपाल प्रहरीका जवान र हवाल्दार सम्मलाई १६/१८ वर्षमा स्वेच्छिक अवकासको व्यवस्था गर्न लागिएको उनले बताए ।
गृहमन्त्री लेखकले प्रहरी कल्याण कोषद्वारा निर्माण गरिएको पेट्रोल पम्प निर्माण कार्यले आम उपभोक्ताहरू लाई सहज रुपमा गुणस्तरीय सेवा प्रदान गर्न सकिने बताए । मन्त्री लेखकले प्रहरीले निर्माण गरेको पेट्रोल पम्प आधुनिक तथा सबै किसिमका सेवा सुविधा सहित निर्माण गरिएकाले निजी क्षेत्रले पनि यसको सिको गर्न जरुरी रहेको बताए ।
कार्यक्रममा सहभागी प्रहरी महानिरीक्षक बसन्तबहादुर कुँवरले सुदूरपश्चिम प्रहरी गण कार्यालयको नवनिर्मित भवन उद्घाटन संगै सेवा प्रवाहले नेपाल प्रहरीको मनोबलमा सकारात्मक प्रभाव पर्ने बताए । कुँवरले गुणस्तरीय सेवा प्रदानका लागि सबै दर्जाका प्रहरीलाई निर्देशन समेत दिए ।
धनगढी स्थित प्रदेश प्रहरी कार्यालयमा निर्मित पेट्रोल पम्प निर्माणमा ५ करोड ८७ लाख ७८ हजार ४ सय ४५ र सुदूरपश्चिम प्रहरी गण कार्यालयको नवनिर्मित भवन का लागी १३ करोड ४० लाख ८९ हजार ३ सय ३ रुपैयाँ खर्च भएको छ ।
